Surxondaryoda Saljuqiylar davriga tegishli oltin dinor topildi (foto)

^{Foto: Surxondaryo viloyati hokimligi axborot xizmati}
Surxondaryo viloyati hokimligi axborot xizmatining xabar berishicha, Termiz tumani Doʻstlik mahallasida yashovchi Ulkan Eraliev oʻziga tegishli bogʻni sugʻorish chogʻida erdan sariq metall parchasini topib olgan va bu haqda Termiz arxeologiya muzeyiga murojaat qilgan.

^{Foto: Surxondaryo viloyati hokimligi axborot xizmati}
Mutaxassislardan iborat guruh topilma aniqlangan joyda dastlabki ish jarayonini olib borib, Qoraxoniylar va Saljuqiylar davriga oid kulolchilik buyumlari parchalarini topgan.

U.Eraliev qimmatbaho topilmani Termiz arxeologiya muzeyiga topshirgan. Unga amaldagi qoidalarda belgilangan haq toʻlab berilgan. Muzey mutaxassislari va numizmatlari tomonidan qimmatbaho topilma dastlabki ekspertizadan oʻtkazilgan.

^{Foto: Surxondaryo viloyati hokimligi axborot xizmati}
Mutaxassislar oltin dinorning old tomoniga «Alloh» va «Muhammad» soʻzlari yozilganini, orqa tomonidagi yozuv deyarli oʻchib ketganini aniqlashgan. Shikastlangan, lekin yaxshi saqlanib qolgan tanga – oltin dinorning ogʻirligi 1,92 grammni tashkil etgan. “Zamin”ni Telegramʻda oʻqing!