Putinning qiyofadoshi: «Men uni yomon koʻraman!»

Internetni izlashtirsangiz, Putinning qiyofadoshlari kam emas. Lekin, allaqanday farqlar ular Putin emasligini fosh qiladi. Ammo Slavamir Sabola Putinga judayam oʻxshaydi. Shuning uchun ham Germaniya kinosanoati ijodkorlari Rossiya-Ukraina urushi haqidagi koʻp seriyali filmiga aynan uni aktyor sifatida taklif qilgan.

Germaniya kinosanoati tomonidan suratga olinayotgan filmda hamyurtimiz Umidjon Isabaev esa Zelenskiy obrazini yaratmoqda.

Umidjonning aytishicha, tasvirga olish maydonchasi nafaqat Putinning qiyofadoshi Slavamir Sabola, balki Shimoliy Koreya rahbari Kim Chen Inning qiyofadoshi Hovard Iks bilan ham birgalikda ijod qilish, tajriba almashish, shuningdek, doʻstlik maydoni boʻlmoqda.

Yigitlar may oyidan buyon s'emkalardan boʻshamaydi. Tagʻin tasvir olish jarayonlari birda Polshada, birda Germaniyada, bir qarasangiz Indoneziyada oʻtayapti. Yaqinda ular bir necha hafta Kanadada safarda boʻldilar.

«Kanada iqlimi Ukraina ob-havosiga oʻxshash jihatlari borligi uchun shu mamlakatdagi maydonlar bizga qoʻl keldi», deydi Umidjon. Safarda ketma-ket, tigʻiz tasvirga olish jarayonlaridan keyin shu kunlarda yigitlarga ta'tilga chiqishgan.

Polshada, oʻz oilasi davrasida hordiq chiqarayotgan Slavamir «Xabar.uz»ga shunday deydi: «Men avval Putinni hurmat qilardim, lekin «harbiy operatsiya» deb Ukrainaga bosqinchiligidan keyin, endi uni yomon koʻraman. Putinga qiyofadosh boʻlishim? Bu mening siyratim ham unga oʻxshash degani emas. Men urushni ham yomon koʻraman. Begunoh odamlar, hali yashashi kerak boʻlgan ayollar, bolalar oʻlishini istamayman. Kinostudiya bilan shartnomamda men aktyor sifatida imzo chekkanman. Ya'ni faqat sahnada johil, kaltabin rahbar rolini ijro qilaman, xolos».

Slavamir urush tezroq tugashini istovchi millionlardan biri ekanini ta'kidladi.

Film haqida toʻliq ma'lumotni taqdim qilish mumkin emasligi haqida aktyorlarning shartnomasida maxsus band bor. Shu sabab bu borada ularni savolga tuta olmaymiz.

Ammo film ezguliklar gʻalabasi aks etgan sahna bilan tugashini tilab qolamiz. “Zamin” yangiliklarini “Telegram”da kuzatib boring