Aktrisa Zarina Yoʻldosheva 23 yoshda: Mehribonlik uyida ulgʻaygani, xaroba uyni rad etgani va shaxsiy hayotidan voz kechgani haqida

Aktrisa Zarina Yoʻldoshevani hazilomuz videolari sabab koʻpchilik hayotda dardsiz va muammolardan holi qiz deb oʻylaydi. Ammo endigina 23 yoshni qarshilagan Zarina Yoʻldosheva bolaligidan qiyinchiliklar ichida oʻsdi. Avvaliga otasidan, soʻng onasidan ayrildi. Eng yomoni u 16 yoshiga qadar Mehribonlik uyida tarbiyalandi. Chiroyli qizni yoʻldan aynitadigan insonlar koʻp boʻladi. Ammo Zarina ularning gap-soʻzlariga e'tibor bermay qoʻygan maqsdlari sari dadil qadam tashladi.

“Ota-onamdan erta ayrilganman”

— Dadamni eslolmayman, onam esa 12 yoshimda kasallik sabab vafot etdi. Buvim keksayib qolgani va moddiy jihatdan qiyinchiliklarga duch kelgani uchun men, singlim va ukamni bolalar uyiga topshirishga majbur boʻlgan. Toʻrt yil davomida mehribonlik uyida tarbiyalandim. U paytda buvim 70 yoshga toʻlgani uchun uchta yosh bola bilan qiynalib qolgan. Holam, togʻamning oʻz oilasi va oʻziga yarasha muammolari bor edi. Shu bois bizni maktab-internatiga topshirmoqchi boʻlishgan. Kimdir buvimga “Maktabi ham internat ichida ekan. Yakshanba kuni uyga olib kelsangiz boʻladi”, — degan ekan. U paytda men 6-sinfda oʻqirdim. Ukam va singlimga qaraganda ancha katta boʻlganim uchun maktab-internati nima ekanligini yaxshi bilardim. Ammo u erga borgach, hammamiz bu shunchaki maktab-internati emas, ota-onasiz yashaydigan mehribonlik uyi ekanligini bilganmiz. Rossa yigʻlaganmiz, bizga qoʻshilib buvim ham koʻzyosh toʻkkan. Ammo oʻsha paytdagi oilaviy sharoit sabab, bizni bu erda qoldirishga majbur boʻlgan. Buvimning yoshi katta boʻlishiga qaramay har hafta bizni koʻrgani kelardi, — deydi aktrisa.

“Mehribonlik uyida raqsga mehr qoʻydim”

Aktrisaning oila a'zolari orasida san'atkorlar yoʻq. Ammo onasi rahmatli ham bolaligida san'atga qiziqqan ekan. Zarina Yoʻldoshevaning san'atga mehr qoʻyishiga Mehribonlik uyidagi raqs toʻgaragi sabab boʻlgan.

— Darsdan keyin raqs toʻgaragiga qatnashardim. Shunda raqs murabbiyim “Sen Xoreografiya oliy maktabida oʻqishing kerak, qobiliyating bor”, dedi. Maktabni tamomlaganimdan keyin qoʻlimdan ushlab, Toshkentdagi Xoreografiya oliy maktabiga olib kelib, oʻqishga joylashtirishgan. Klassik raqs harakatlaridan bexabar boʻlganim uchun koʻp qiynalganman, dugonalarim tomonidan kamsitilgan paytlarim ham boʻlgan. Toshkentga kelib yashashim oson kechmadi. Moddiy qiyinchiliklar sabab toʻylarga chiqib pul ishlashga ham majbur boʻlganman. Ammo bu ishimdan buvim qattiq ranjigan. Shu bois qayta toʻylarga chiqmaganman.

“Xarob uyni olmadim”

Zarina Yoʻldosheva intervyularining birida mehribonlik uyidagi hayoti va davlat tomonidan berilgan uyni rad etganligi haqida ham soʻzlab bergan.

— Ba'zan mehribonlik uyida oʻsgan bolalar mehrsiz boʻladi, degan gaplarni eshitib xafa boʻlardim. Hayotda ota-onasining bagʻrida oʻsib ham mehrsiz boʻlgan bolalar kam emas-ku? Mehribonlik uyida oʻsgan bola mehrsiz emas, aksincha mehrga chanqoq boʻladi. Istaymizmi, yoʻqmi mehribonlik uyida unga hamma begona, urilib-surilib katta boʻladi. Eng yaxshi deyilgan mehribonlik uyida ham tarbiyachilar bolalarga mehr bermaydi. Shuning uchun ham tashqaridagi insonlar unga ozgina mehr berishsa, quvonib ketishadi.

Mehribonlik uyining ham ichki tartib-qoidalari bor. Hatto ularning ba'zilaridan tarbiyachilar ham bexabar boʻlishadi. Masalan, yoshi kichik bolalar katta bolalarning xizmatini qilishi kerak. Qoidaga boʻysunmagan bola, albatta, jazolanadi. Chaqaloqlik paytidan mehribonlik uyida ulgʻaygan bolalar anchayin agressiv boʻlishadi.

Menga ham hokimiyat tomonidan uy berish toʻgʻrisida buyruq chiqarilgan edi. Oʻzim Toshkentda boʻlganim uchun uni buvim koʻrib keldi. Bizga berilgan uy qandaydir eski maktab binosida ekan, buvimning aytishicha, bu uyda eng muhtoj inson ham yashashi mushkul. Bunday xarob uyni olmay, imtiyozli kredit asosida ikki xonali uy sotib oldim.

“Yulduz Usmonova sabab aktrisalikka qadam qoʻydim”

— 2017 yili ansamblimiz bilan Yulduz Usmonovaning “Ey aziz inson” kontsert dasturida ishtirok etganmiz. Yulduz opa sozandalar bilan mashq qilayotganida bir chetda maroq bilan qoʻshiqqa raqs tushganman. Shunda Yulduz opa yonlariga chaqirib, shu qoʻshiqqa yakka raqs tushsin, degan.

Bir necha oydan soʻng, yarim kechasi Yulduz Usmonovaning ma'muri qoʻngʻiroq qilib, qaysidir aktrisa klip 'syomka'siga kelolmagani va oʻrniga men suratga tushishimni aytdi. Rosti, bu taklifga koʻnishim oson boʻlmadi. Suratga olish ishlari bor-yoʻgʻi 30-40 daqiqa davom etdi.'Syomka'dan soʻng klipdagi epizodim uchun 50 AQSh dollari berishdi. Bu 17 yoshimgacha topgan eng koʻp pulim edi. Mana shu voqeadan soʻng kliplardan taklif tushsa, rad etmaydigan boʻldim, — deydi Zarina Yoʻldosheva. 

“Oʻzimni bechora koʻrsatib, atrofdagilarning rahmini keltirgim kelmaydi”

— Men oʻzimni bechora koʻrsatib, odamlardan nimadir tilab yashashni istamayman. Hatto san'atga kirganimdan keyin ham ancha muddat atrofdagilarga shaxsiy hayotim haqida aytmaganman. Mehribonlik uyi rahbarini “Odamiylik mulki” koʻrsatuviga taklif etishganida, menga qoʻngʻiroq qilib: “Sen ham borib intervyu ber”, dedi. Rosti, shu darajaga etishimga hissa qoʻshgan insonga rad javobini berolmadim. Koʻrsatuv efirga ketgach, atrofimdagi insonlar shaxsiy hayotimdan xabar topishdi,  — deydi Zarina Yoʻldosheva. 

“Kimgadir pul berib, rol ijro etmayapman”

— Shu kungacha hech bir rejissyorga rol soʻrab murojaat qilmaganman. Taklif etishsa, imkon darajasida ijro etaman. Ammo oʻzimni qobiliyatli aktrisa deb bilmayman. Yoshi katta aktrisalar bilmaganlarimni oʻrgatishadi, institutda oʻqishimni tavsiya qilishadi. Ba'zi yosh aktrisalar esa ortimdan negativ gaplar tarqatib, gʻashimni keltirishadi. “Oʻzini bechora koʻrsatib, piar qilyapti yoki pul berib rollar ijro etyapti”, degan gaplar ham qulogʻimga chalindi. Menimcha, hech bir inson ota-onasi vafot etganligi haqida gapirib obroʻ olishni istamaydi. Men san'atga pul berish emas, pul ishlash uchun qadam qoʻyganimni ham koʻpchilik bilishadi,  — deydi Zarina Yoʻldosheva. 

“Singlim va ukamni oyoqqa qoʻymagunimcha shaxsiy hayotim haqida oʻylay olmayman”

— Yashirmayman, ota-onamning uyi boʻlmagan. Ukam bilan singlim mehribonlik uyidan kelgach, oʻz uyida yashashini istardim. Shu bois institutda oʻqishni istamadim. Bolaligimdan ukam bilan singlim Mehribonlik uyidan qaytganida uysiz yashaydimi, deb qoʻrqqandim. Shukrki, ular Mehribonlik uyini tamomlagunlariga qadar uy-joyli boʻlish niyatim ham amalga oshdi. Singlim Charos Nizomiy nomidagi pedagogika universitetida tahsil oldi, Ukam Lochinbek ham oʻqish bilan band. Ularning toʻyini qilish va baxtli kunlarini koʻrish orzuyim bor,  — deydi Zarina Yoʻldosheva. 

“Aktrisalikni davom ettirish niyatim yoʻq”

— Kelajagimni san'at sohasida tasavvur etmayman. Aktrisalikni davom ettirish niyatim yoʻq. Farzandlarim menda boʻlmagan toʻkis-tugal oilada voyaga etishlarini istayman. Ularni maktabga olib borish va uyga olib kelish katta baxt. Oʻzim koʻrmagan baxtni farzandlarim his qilishini orzu qilaman, — deydi aktrisa Zarina Yoʻldosheva.

Aktrisa shu kungacha, “Koʻngil”, “Oʻjar homilador” kabi seriallarda suratga tushgan. Bundan tashqari, u Shahzod Sultonov bilan birga ijtimoiy tarmoqlar uchun videolar ham suratga oladi. Ayrim kuzatuvchilar ular bir-biriga mos juftlik ekanligini aytishadi. Ammo ijodkorlarning ikkisi ham shunchaki hamkor ekanligini va oʻrtalarida muhabbat yoʻqligini ta'kidlashadi .

Шухрат Раззаков

«ZAMIN.UZ» muharriri