Umida Mirhamidova: “Qozogʻistonda singan qoʻlim bilan sahnaga chiqqanman”

Xonanda Umida Mirhamidova “Daryo”ga bergan intervyusida san'atkorlarda ham qiyin vaziyatlar boʻlishi, ogʻir ahvolda ham xalq xizmatlariga borishga majbur boʻlgani va odamlar holatni bilmay turib nooʻrin gap-soʻz qilishi haqida gapirdi.

— Ham ijod, ham mas'uliyat yuki garchi tobim boʻlmasa-da, hozir “Bravo”ning kontsert oldi repetitsiyasida qatnashishimga sabab boʻlyapti. Bilasiz, xalq xizmatidagi odammiz, xizmatlar 22:00 dan keyin tugaydi. Bugun ham tayyorgarlik jarayoniga xizmatdan chiqib keldim. Yigitlar kechki sakkizdan yigʻiladi va hamma toʻplangunga qadar kutadi, chunki repetitsiya uchun jamoa toʻliq boʻlishi kerak. Kechagi yomgʻirli kunda faqat menmas, jamoaning boshqa ishtirokchisi Durdonaxon ham shamollab qoldi. Jamoa menga ishongan, shuning uchun ham tobim yoʻq edi, borolmayman, deyolmayman.

Kerak boʻlsa, avvaldan belgilab qoʻyilgan toʻy xizmatlariga mas'uliyatni his qilib boraman. Lekin lafz bor, boramiz dedikmi, boramiz. Juda ogʻir vaziyatlarda borolmasligimiz mumkin. Ammo qoʻl-oyogʻimiz but, tilimiz biyron boʻlib aylanib turibdi, ozgina isitma borligini hisobga olmasa, hammasi yaxshi. Bu yigitlarni koʻrib kasallik ham esdan chiqib ketadi. Kelganidan beri tinmaydi, bir zum tayyorgarlikdan toʻxtamayapti, men-ku hech boʻlmasa dam olyapman. Ularning harakatini koʻrib, kasalman deyishga haqqim yoʻq.

— Gap isboti bilan: Qozogʻistonga tadbirga borganimizda zinadan qoqilib ketib, qoʻlim sinib qoldi. Kechqurun xizmatga chiqishim kerak edi. Juda qattiq ogʻridi, lekin qoʻlim qimirlab turgani uchun uncha e'tibor bermadim. Shu bilan Toshkentga qaytganimizda ogʻriq kuchayib ketdi. Kasalxonaga borib rentgen qildirsam singan dedi va gips qilingan qoʻl bilan chiqib ketdim.

Yana bir voqea: “QVZ”da chiqadigan paytim birdaniga bel ogʻrigʻi tutib qoldi, xalq tili bilan aytganda “grija”. Menda “grija” bor deb hech oʻylamagandim. Repetitsiya paytida belimga qalin jun roʻmollar bogʻlab yurganman, faqat oʻtirib tayyorlanganman, turolmaganman. Oʻsha kontsertni ahamiyat berib tomosha qilsangiz, juda sekin yurganman. Hattoki bel ogʻrigʻim tutib qolsa, goʻyo sizlarga suyangandek boʻlib turaman, shunday sahnalar ham qilamiz, deb yigitlarga iltimos qilganman. Chunki chidab boʻlmas darajadagi ogʻriq bor edi.

Oʻsha vaqtlar qishda qattiq qor yoqqandi. Yunusobodda juda uzun zinali toʻyxonaga xizmatga bordik. Toʻy egalariga belim ogʻriyotganini tushuntirdim. Meni e'lon qilganingizda yugurib sahnaga chiqolmayman, goʻyoki siz bilan gaplashib borayotgan sekin yurib kelaman, dedim. Toʻyxona sahnasi ham bir oz yuqoriroq ekan, tepaga chiqmay, oʻzimcha obraz yasab, sahnaga oʻtirib qoʻshiq kuylaganman. Lekin bunday vaziyatlarni muxlislarga sezdirmaslikka harakat qilamiz. Nega desangiz, pul oʻlsin, shu ahvolida ham pul deb toʻyga kelibdi, deydiganlar bor. Lekin biz rostdan ham shunday ogʻir ahvoldaligimizni toʻy egalariga koʻrsatmagunimizcha ular ishonmaydi. Shu sababli ham mana shunday qiyin vaziyatlarda vazifamizni bajarishga harakat qilamiz, deydi xonanda. “Zamin” yangiliklarini “Telegram”da kuzatib boring