22:11 / 04.01.2025

2024 yilda vafot etgan mashhurlar...

^{© Sputnik / Aleksey Kudenko}
2024 yil oʻz nihoyasiga etdi. Hech bir yil yoʻqotishsiz boʻlmaydi. Oʻtgan yilda ham el hurmatiga sazovor boʻlgan, oʻzidan yorqin xotira qoldirgan koʻplab taniqli shaxslar bu olamni tark etdi.

Turgʻun Azizov – 22 yanvar

Oʻzbek kino hamda teatr san'atining chinakam afsonasi, aktyor va rejissyor, Oʻzbekiston xalq artisti Turgʻun Azizov 90 yoshida vafot etdi.
Turgʻun Azizov “Maftuningman”, “Odamlar orasida yolgʻiz”, “Hayot tunda oʻtib ketdi”, “Olovli yoʻllar”, “Qabrdan qaytgan umr”, “Nodirabegim” kabi koʻplab filmlarda rollar ijro etgan. Teatr sahnasida koʻplab klassik va shoh asarlarda bosh qahramonlarni gavdalantirish bilan bir qatorda 15 tadan ortiq spektaklni rejissyor sifatida sahnaga qoʻygan.

^{Turgʻun Azizov
© O'zbekiston Kinoarboblari IU}
Abror Tursunov – 7 fevral

Aktyor va rejissyor Abror Tursunov “Kulol va xurmacha” filmidagi roli bilan muxlislarga tanish boʻlgan.
Kinoaktyor faoliyati davomida “Chinor ostidagi duel”, “Suyunchi”, “Abdullajon”, “Kim jinni”, “Ayollar saltanati” kabi koʻplab filmlarda rol ijro etgan.

^{Abror Tursunov}
Jasur Shametov – 10 fevral

Operator va rejissyor Jasur Shametov 39 yoshida vafot etdi. U “Zarb”, “Gunoh”, “Poyma poy”, “Sadoqat”, “Qalbaki dunyo”, “Achchiq hayot”, “Qalbim oʻgʻrisi” kabi bir qancha badiiy filmlarda operatorlik, “Mahallada nima gap” musiqiy-komedik filmida rejissyorlik, “MTV shou” dasturida prodyuserlik qilgan. Mahoratli operator bir qancha xalqaro tanlovlarda ishtirok etgan.

^{Jasur Shametov
© O'zbekiston Kinoarboblari IU}
Erkin Samandar – 13 aprel

Oʻzbekistonda xizmat koʻrsatgan jurnalist, shoir, nosir va dramaturg Erkin Samandar 89 yoshida vafot etdi.
U 1990-1993-yillarda Oʻzbekiston Bosh vazirining oʻrinbosari lavozmida ham faoliyat yuritgan.

^{Erkin Samandar
© O'zbekiston Kinoarboblari IU}
Mashrab Kimsanov – 2 may

Oʻzbekistonda xizmat koʻrsatgan artist, taniqli kinoaktyor Mashrab Kimsanov 69 yoshida vafot etdi.
Mashrab Kimsanov “Vodillik kelin”, “Olovli yoʻllar”, “Otamdan qolgan dalalar”, “Masxaraboz”, “Umid”, “Zebuzar”, “Hayot mamot”, “Haqiqiy erkaklar ovi”, “Sehrli qalpoqcha”, “Onaginam orzusi” kabi filmlarda esda qolarli rollarni ijro etgan. Shuningdek, ijodkor “Togʻlik kuyov” filmining postanovkachi rejissyori hisoblanadi.

^{Mashrab Kimsanov
© O'zbekiston Kinoarboblari IU}
Malika Qayumova – 13 iyun

Oʻzbekistonda xizmat koʻrsatgan artist Malika Qayumova 70 yoshda olamdan oʻtdi.
Malika Qayumova teatr san'atida oʻziga xos oʻchmas iz qoldirgan. U oʻzining ijodiy faoliyati davrida teatrda sahnalashtirilgan 30 dan ziyod spektakllarda bosh rollarni hamda xarakterli obrazlarni gavdalantirgan. “Taqdir”da amma, “Devona”da ona, “Alpomish”da Kuntugʻmish, “Fotima va Zuhra”da ona, “Pari qishloq”da ona kabi obrazlarni yaratgan.

^{Malika Qayumova
© O'zbekiston Kinoarboblari IU}
Behzod Yoʻldoshev – 28 avgust

Oʻzbekiston Fanlar akademiyasi prezidenti, yuqori energiyalar fizikasi sohasida xalqaro miqyosda taniqli va e'tirof etilgan olim, fizika-matematika fanlari doktori, professor, akademik Behzod Yoʻldoshev 79 yoshida vafot etdi.

^{Behzod Yoʻldoshev
© O'zbekiston Kinoarboblari IU}
Bobomurod Hamdamov – 2 sentyabr

Oʻzbekiston, Turkmaniston va Qoraqalpogʻiston xalq artisti Bobomurod Hamdamov 84 yoshida vafot etdi.
Bobomurod Hamdamov oʻzbek milliy qoʻshiqchilik san'atining rivojlanishida salmoqli hissa qoʻshgan. Uning “Sulton Jaloliddin”, “Kim ekan”, “Devona”, “Galdimu”, “Qoʻrqdim” kabi qoʻshiqlari keng ommalashgan.

^{Bobomurod Hamdamov
© O'zbekiston Kinoarboblari IU}
Musaxon Nurmatov – 9 sentyabr

Oʻzbekistonda xizmat koʻrsatgan madaniyat xodimi, taniqli bastakor Musaxon Nurmatov 56 yoshida vafot etdi.
Musaxon Nurmatov 1990-yillar oxiri, 2000-yillar boshida yaratilgan oʻzbek milliy etrada san'atidagi yuzlab qoʻshiqlar musiqasining muallifi. Uning “Laylim”, “U goʻzal boshqa”, “Adashdim”, “Yana sogʻindim, yana”, “Meni sevib qolsayding” kabi qoʻshiqlari mashhur.

^{Musaxon Nurmatov
© O'zbekiston Kinoarboblari IU}
Bibisora Turobova – 15 sentyabr

Taniqli shoira Bibisora Turobova 72 yoshida vafot etdi.
Uning oʻnga yaqin she'riy kitoblari nashr etilgan. Shoiraning 2011 yilda yozilgan “Oʻlsam, janozamni bulbul oʻqisin” she'ri mashhur.

^{Bibisora Turobova
© O'zbekiston Kinoarboblari IU}
Ahmad Narzullayev – 1 noyabr

Taniqli fermer, Oʻzbekiston Qahramoni Ahmad Narzullayev 68 yoshida vafot etdi.
U 1991 yildan “Lochin” fermer xoʻjaligi rahbari sifatida fidokorona mehnat qilgan. “Oʻzbekiston Qahramoni” unvoni va “Mehnat shuhrati” ordeni bilan mukofotlangan.

^{Ahmad Narzullayev
© O'zbekiston Kinoarboblari IU}
Halima Ibragimova – 7 dekabr

Aktrisa Halima Ibragimova 45 yoshida vafot etdi. Halima Ibragimova “Mirzo” teatri a'zosi edi.

^{Halima Ibragimova
© Ijtimoiy tarmoqlar}
Toʻlqin Tojiyev – 13 dekabr

Oʻzbek Milliy akademik drama teatri ustoz san'atkori, oʻzbek dublyaj san'atining qiroli, Oʻzbekiston xalq artisti Toʻlqin Tojiyev 88 yoshda vafot etdi.

Toʻlqin Tojiyev Oʻzbek Milliy akademik drama teatrida yuzdan ortiq obrazlar yaratgan. “Oʻzbekfilm” kinostudiyasida oʻzbekchaga oʻgirilgan mingdan ortiq xorij filmiga ovoz bergan.

^{Toʻlqin Tojiyev
© O'zbekiston Kinoarboblari IU}
Shafoat Rahmatullayeva – 24 dekabr

Oʻzbekiston xalq artisti, teatr va kino aktrisasi Shafoat Rahmatullayeva 83 yoshda vafot etdi.
U koʻp yillar davomida teatr sohasida faoliyat yuritib kelgan. Shuningdek, kinofilmlarda turli rollarni ijro etgan.