Yaqin Sharqdagi ayrim davlatlar, jumladan, Suriya va qo‘shni yurtlar boshidan o‘tgan fojialar O‘zbekistonni ayniqsa qo‘lga olmadi. Bu holat, ko‘pchilikning fikricha, birinchi Prezident Islom Karimovning oqilona siyosati va qat’iyatli rahbarligi tufayli sodir bo‘lgan. Bu haqda marhum Prezidentning kenja qizi Lola Karimova-Tillyayeva, otasining vafotining 9-yilligi munosabati bilan Instagram sahifasidagi videopostida fikr bildirdi.
U otasini odatdagiday shaxsiy hikoyalar orqali xotirlamoqchi emasligini, bunga hali tayyor emasligini, ammo Islom Karimovning qiziga bergan maslahatlarining qanchalik haq ekanini vaqt o‘tishi bilan yanada yaxshiroq anglab yetayotganini ma’lum qildi.
“Bugun birinchi Prezidentimizni mehr va samimiyat bilan eslab o‘tayotgan barcha insonlarga o‘z minnatdorchiligimni bildirmoqchiman. Hammangizga rahmat aytaman. Bilaman, bugun ko‘pchilik mendan odatdagidek shaxsiy hikoya kutadi. Ishonchim komilki, bu siz kutgan hikoya bo‘ladi. Lekin hozircha uni aytib berishga tayyor emasman, chunki hikoya hali davom etmoqda. Faqat shuni aytmoqchimanki, hatto shaxsiy hayotimga oid maslahatlarida ham otam naqadar haq bo‘lganini bugun yanada chuqurroq anglamoqdaman. Bu hikoyani balki keyingi safar so‘zlab berarman”, dedi Lola Karimova-Tillyayeva.
U otasining qilgan ishlarini, xotirasini, mustaqillikning ilk yillarida, ya’ni 1990 va 2000-yillar boshidagi o‘z yo‘lini va dono siyosati bilan uzoqni ko‘ra bilish qobiliyatini eslatib o‘tdi.
“Bugun dunyoga nazar solganimda, uning ko‘plab qarorlarida qanchalik haq bo‘lganini yanada yaxshi tushunyapman. Shuni ko‘pchilik ham qo‘shiladi deb o‘ylayman. Shu bilan birga, ayrim vaqtlarda uning siyosati va o‘tmishini kamsitishga urinishlar ham paydo bo‘layapti. Lekin men qat’iy ishonch bilan aytaman: Birinchi Prezidentimiz O‘zbekistonni ichki nizolar va to‘qnashuvlardan asrab qolgan. Yaqin Sharqdagi ayrim davlatlar, jumladan, Suriya va qo‘shni yurtlarda sodir bo‘lgan fojialar O‘zbekistonni chetlab o‘tgan bo‘lsa, bu aynan uning dono siyosat va qat’iyatli rahbarligi tufayli bo‘lgan. Buning uchun unga minnatdorlik bildirishga haqlimiz. Bu faqat mening shaxsiy fikrim emas, deb o‘ylayman”, dedi Lola Karimova-Tillyayeva.
Karimova-Tillyayevaning ta’kidlashicha, Islom Karimov nomini yomon ko‘rsatishga urinayotgan suhbatlar, yolg‘on intervyular va turli “trollar” faoliyati ham uchrab turibdi.
“Bular kulgili va arzimagan ko‘rinadi. Chunki tarixda allaqachon o‘z o‘rnini topgan insonni hech kim inkor qila olmaydi. Ha, turli nuqtayi nazardan uni baholash mumkin, ammo eng asosiysi, uning qilgan ishlari O‘zbekistonni bugungi yo‘lga olib chiqdi”, dedi Karimovning kenja qizi.
U so‘zida davom etarkan, Samarqandda Islom Karimov maqbarasini ziyorat qilib, unga duo qiluvchi minglab insonlarni qadrlashini ham ta’kidladi.
“Yuz minglab odamlarning muhabbati va duolari uning hayoti davomida xalqqa ko‘rsatgan e’tibori va samimiy mehriga munosib javob deb bilaman. Bu muhabbat uning vafotidan keyin ham davom etmoqda. Bugun yana bir bor barchangizga minnatdorchilik bildiraman va otam uchun duo qilaman”, dedi Lola Karimova-Tillyayeva.v
“Zamin”ni Telegramʻda oʻqing!
