«Hayvonlar shahri–2» multfilmini suratga olgan rejissyorlar — Bayron Hovard va Jared Bush Xitoydagi Weibo ijtimoiy tarmog‘ida franshiza muxlislari bilan jonli muloqot o‘tkazdi. Suhbat davomida ijodkorlar «Hayvonlar shahri» olamining uchinchi qismi ustida ishlar allaqachon boshlab yuborilganini ochiq ma’lum qildi.
Rejissyorlarning ta’kidlashicha, uchinchi qismning premerasi ikkinchi film kabi to‘qqiz yil davomida kechiktirilmaydi. Bayron Hovard bu borada shunday fikr bildirdi: “Men shoshilishni yoqtirmayman, ammo to‘qqiz yil — juda uzoq vaqt. Keyingi film ancha tezroq ekranlarga chiqadi, deb umid qilamiz”. Bu so‘zlar muxlislar orasida katta umid uyg‘otdi.
Jared Bush esa ayni paytda jamoa turli syujet yo‘nalishlari ustida faol ish olib borayotganini qayd etdi. Uning so‘zlariga ko‘ra, g‘oyalarni shakllantirish jarayoni odatda 2–3 yilni talab qiladi, animatsion filmni to‘liq yaratish esa 4–5 yil vaqt oladi. Agar barcha rejalar belgilangan tartibda amalga oshsa, «Hayvonlar shahri–3» taxminan 2030 yil atrofida namoyish etilishi mumkin.
Shu bilan birga, ijodkorlar uchinchi qismda qushlar paydo bo‘lishi ehtimolini ham istisno qilishmadi. Ular ikkinchi qism finalida ko‘zga tashlangan pat aynan shu g‘oyaga ishora bo‘lishi mumkinligini ta’kidladi. Mushuk va itlarning nega multfilm olamida yo‘qligi haqida so‘ralganda esa, rejissyorlar bu holat «Hayvonlar shahri»da odamlar kabi uy hayvonlari mavjud emasligi bilan bog‘liq ekanini tushuntirishdi.
“Aslida itlar bor, ammo ular tomoshabinlar odatlangan uy itlari emas. Otlar borasida esa istisnolar mavjud — bizda ham yovvoyi, ham uy otlari uchraydi. Qoidalarga amal qilishga harakat qilamiz, lekin ba’zan ulardan chiqishga to‘g‘ri keladi”, — dedi Jared Bush.
Bundan tashqari, ijodkorlar ayrim qahramonlarga bag‘ishlangan alohida eskizlar va spin-off loyihalar yaratilishi mumkinligini ham istisno etmadi. Xususan, tomoshabinlar sevimlisi bo‘lgan yalqov Blits haqida alohida loyihalar ishlab chiqish g‘oyasi mavjud. Ularga ko‘ra, «Hayvonlar shahri» olami juda boy va keng bo‘lib, uni faqat to‘liq metrajli filmlar bilan cheklash to‘g‘ri bo‘lmaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
