“Muhtasham yuz yil” (“Velikolepnыy vek”) tarixiy turk seriali ko‘pchilik tomoshabinlar orasida ommalashib ketgan edi.
Kimlardir Sulton Sulaymonning aqli va topqirligini ta’kidlasa, yana kimlardir Xurrem Sultonning (Aleksandraning) latofatiga, har qanday vaziyatdan silliqqina chiqib keta olish mahoratiga qoyil qoldi.
Ha, chindan ham serialni ko‘rgan inson rang-barang obrazlar orqali turli vaziyatlarga guvoh bo‘ladi. Serialning biror sonini ham o‘tkazmay kuzatib borgan muxlislar uning tugashini aslo istashmadi.
Shu bois bo‘lsa kerak, Durul Taylan va Yagmur Taylanlar rejissyorligida mazkur serialning mantiqiy davomi ham suratga olindi. Serial nomiga u qadar katta o‘zgartirish kiritilgani yo‘q. “Muhtasham yuz yil. Ko‘sem imperiyasi”.
Uning ilk premerasi 2015 yil 12 noyabrda “Star TV” telekanalida bo‘lib o‘tdi. Rossiyaning “Domashniy” telekanali orqali esa 2017 yilning 7 yanvar sanasida efirga uzatildi.
Tabiiyki, bu serial O‘zbekiston halqi orasida ham barcha turk seriallari kabi iliq kutib olindi. Hozirda “Ko‘sem” nomi bilan ommalashib borayotgan mazkur serial “Milliy TV” telekanali orqali namoyish etilmoqda.
Yangi serial tomoshabinlarni Sulton Sulaymondan yuz yildan keyin Usmoniylar imperiyasiga hukmronlik qilgan Sulton Ahmad I davridagi voqealar bilan tanishtiradi.
Serial yaratuvchilarining aytishicha, “Muhtasham yuz yil. Ko‘sem imperiyasi” suratga olinishidan avval barcha aktyorlar dala sharoitidagi maxsus oromgohlarda tayyorgarlik ko‘rishgan. Bir necha hafta davomida ular ochiq maydonda yashashgan, ovqat tayyorlashgan, yog‘och kesishgan. Bu ularga o‘z qahramonlarini yana ham yaxshiroq tushunishlariga, ya’ni o‘z rollarini yurakdan ijro etishlariga zamin yaratgan.
Shuningdek, ma’lum bo‘lishicha, “Muhtasham yuz yil” serialini yaratish uchun 4 000 000 turk lirasi sarf etilgan bo‘lsa, “Ko‘sem” serialiga yanada ko‘proq mablag‘ sarflangan. Buni qarangki, serialning ilk qismi 20 kun mobaynida suratga olingan. Albatta, bu oz vaqt emas. Sababi, turk seriallarida har bir qism asosan 3–4 kun ichida suratga olinadi.
Serialda bir qancha mashhur turk aktyor va aktrisalari ishtirok etgan. Sulton rafiqasining turli davrlardagi rolini to‘rt nafar aktrisa ijro etadi. Ular orasida gollivudlik aktrisa Sara Xayland ham bor.
Ko‘semning qizlik paytidagi rolini Beren Saat, asosiy davrdagi rolini esa mallasoch grek aktrisasi Anastasiya Tsilimpou ijro etadi. Axmed I sulton obrazini esa aktyor Ekin Koch gavdalantirgan.
“Axmed sulton — Usmoniylar imperiyasining hukmdori. U serialning har bir qismi davomida ulg‘ayadi va borgan sari beshavqat bo‘lib boradi. Avvaliga u atrofdagilarning fikriga quloq solgan bo‘lsa, kasallikdan tuzalgach, bo‘lib o‘tgan voqealarga afsuslanish tuyg‘usini tuyadi”, deydi aktyor Ekin Koch.
Axmed I ning buvisi Safiye Sulton roli Xyulya Avshar tomonidan maromiga yetkazib ijro etilgan. Albatta, serialda grek aktrisasi Anastasiya Tsilimpou ishtirokini ko‘rish tomoshabinni biroz taajjublantirishi mumkin. Biroq, aktrisaning aytishicha, ushbu serialda rol ijro etish u uchun kutilmagan taklif bo‘lgan.
“Gretsiyada Sulaymon Sulton juda mashhur bo‘lgan. U menda katta taassurot uyg‘otgan edi. Mana endi men ham shu serialning bir qismiga aylandim, bundan esa juda xursandman. Chunki bu menga katta orzu edi. Prodyusserlar menga ushbu rolni taklif etishganda, tushundimki, rolni bor aktyorlik mahoratim, turli emotsiyalar bilan ijro etishim kerak. Va dastlab men ingliz tilida gapirdim, biroq ular mendan turk tilida gapirishimni talab qilishdi. Nachora, ushbu rolni juda ham ijro etgim kelgani bois, qanchalik qiyin bo‘lmasin men buning uddasidan chiqdim”, deb qo‘shimcha qildi aktrisa.
Serial haqida yana ko‘plab qiziqarli ma’lumotlarni keltirish mumkin. Masalan, aktrisa Beren Saat Ko‘sem sultan rolini ijro etish uchun o‘z imidjini o‘zgartirishiga to‘g‘ri kelgan. U sochini kestirib, uni butunlay boshqa rangga bo‘yagan.
“Ko‘sem” seriali 70 ta mamlakatga sotildi va hozircha 20 dan ortiq telekanallar orqali efirga uzatildi. Ha, aytganday, mazkur serial Gollivudda suratga olingan ilk turk filmidir.
Serial haqida ma’lumot to‘plar ekanmiz, o‘zimizning tomoshabinlar fikri bilan ham qiziqdik. Kimdan so‘ramaylik, serial ularga chindan ma’qul kelganini ta’kidlashmoqda. Masalan, ulardan biri, ingliz tili o‘qituvchisi Iroda Olimjonova qanchalik band bo‘lmasin serialni kuzatishni davom ettirayotganini aytdi.
“...“Ko‘sem” serialini rus tilidagi tarjimasini maroq bilan tomosha qildim. Hozir esa serialning o‘zbek tiliga tarjima qilingan variantini ham kuzatib boryapman. Menga serial bosh qahramoni Ko‘semning aqlli ekanligi yoqdi. U turmush o‘rtog‘ining butun avlodini asrab qolish uchun kurashadi. Hamma ishning ko‘zini bilishi tahsinga loyiq. Ana shu ayol obrazida men o‘zimizning kurashuvchan o‘zbek ayollari obrazini ko‘rdim deya olaman.”
Bizni kuzatishda davom eting va sevib tomosha qilayotgan serialingiz haqida yanada ko‘proq ma’lumotlar bilan tanishib boring.
Manba: qalampir.uz “Zamin” yangiliklarini “Twitter”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Har qanday katta yoshdagi kishi yetuk emas
AQSH harbiylari orasida o‘z joniga qasd qilish ko‘paydi
Erdo‘g‘on Turkiya Isroil bilan aloqalarini uzganini ma’lum qildi
Yaxshi pishgan va mazali anor tanlashga yordam beradigan tavsiyalar
Pashinyan Armanistonning Mustaqillik deklaratsiyani eng katta muammo va fojia deb atadi
Borrel YEIning Isroil bilan muloqotini to‘xtatishni taklif qildi
AQSH Isroilning ikki vaziriga sanksiya qo‘llamoqchi
Raqobat qo‘mitasi birjada Ai-80 benzini boshlang‘ich narxiga cheklov o‘rnatdi
