O‘zbekistonda xizmat ko‘rsatgan madaniyat xodimi, rejissyor Hilol Nasimov xususiy kinostudiyalarda olinayotgan filmlarga o‘z munosabatini bildirib, ularni, har doimgidek, “saviyasizlik”da aybladi hamda namuna tarzida o‘z filmlarini keltirdi. Bu haqda "Darakchi" nashri'ga asoslanib Kun.uz xabar berdi.
“Yaqinda bir anjumanda shoir Muhammad Yusuf haqidagi film namoyish tugagach, xususiy kinostudiyaning rejissyori o‘rnidan turdi-da, “Shunday shaxs bo‘lgan ekan, bugun bu yangilikni kashf qildim”, dedi. Buyuk ijodkorni bilmasligidan lol qoldim. Shu “rejissyor”ning filmlari xalqqa biror nima bera oladi, deya olamizmi?”, – savol beradi ijodkor.
Uning fikricha, xususiy kinofilmlar ijodkorlari milliy urf-odatlarni “erga urmoqda”:
“Urf-odatlarimizga zid sahnalar g‘ashingizni keltiradi. Masalan, ayrim kinokartinalarda ota-ona ekishdan kirib kelsa-da, yalpayib o‘tiradigan qizlar ko‘rsatiladi. Yoki kattalarsiz dasturxonga qo‘l uzatadigan yoshlar. Tur, repetisiya qilamiz, deb sovchilar yoniga patnis ko‘rtarib, choy olib kirishni mashq qildirgan otalarni qaysi xonadonda ko‘rgansiz? Rejissyorlarimiz qachongacha urf-odatlarimizni erga urishadi?”.
Bunday filmlarda ishtirok etayotgan aktyorlar ham Hilol Nasimovning tanqididan chetda qolishmadi.
“Aktyorlar borasida so‘z ketganda, saviyasiz filmlarda suratga tushishdan o‘zini tiyolmayotgan aktyorlarimizga achinaman, – ta’kidladi u. – Bir necha yillar avval O‘zbekistonda xizmat ko‘rsatgan artist Ra’no Shodieva bilan suhbatlashib qolganimizda, “Nega meni filmlaringizga chaqirmaysiz?” deb qoldi. Shunda “Katta ekranlardan tushmay qoldingz-ku, sizga yaqinlashishga qo‘rqaman”, dedim hazil aralash. “Ular xususiy kartinalar-ku. Tirikchilik uchun ham ularda suratga tushaman-da”, dedi”.
Shunga qaramay, rejissyor O‘zbekiston kino san’atini xorijiy davralarda himoya qilib chiqqanini, masalan, “Kinoshok” festivalida Ali Hamroyevning tanqidlariga javob berganini tan oldi. “Zamin”ni Telegramʻda oʻqing!
Ctrl
Enter
Xato topdIngizmi?
Iborani ajratib Ctrl+Enter tugmasini bosing 
