Mashhur kompaniyalar o‘zbek filmlarini o‘z platformalariga joylashtiradi

“O‘zbektelekom” AK Rossiyaning yirik “Ivi” onlayn-kinoteatri bilan hamkorlik qilish bo‘yicha kelishuv imzolashni rejalashtirayapti.

Mazkur brend “Warner Brothers”, “Paramount Pictures”, “Fox”, “Sony Pictures”, “NBC Universal”, “Disney”, “BBC”, “Mosfilm”, “Bazelevs”, “Sentral Partnership” va boshqa shu kabi yirik ishlab chiqaruvchilar kontentidan foydalanish imkoniyatini taqdim etib kelayapti, deb yozadi “Sputnik”.

“Biz Rossiya bozori yetakchisi — “Ivi” va yana bir nechta xorij kompaniyalari bilan muzokaralar olib borayapmiz. Yaqin oylar ichida, ko‘pi bilan yarim yilda, nafaqat internet va IPTVdan foydalanish, balki chet ellik yetkazib beruvchilar kontentiga pullik obuna bo‘lish imkoniyatlarini o‘z ichiga olgan ijtimoiy tarif rejalarini ishga tushirishni mo‘ljallab turibmiz”, — deydi “O‘zbektelekom” AKning marketing va tijorat ishlari bo‘yicha direktori Yevgeni Vishnevskiy.

Uning so‘zlariga qaraganda, xorij kontent yetkazib beruvchilari nafaqat O‘zbekiston bozoriga o‘z mahsulotlari bilan kirish, balki bu yerda mustahkam joy olishni maqsad qilgan. Masalan, ular Rossiya va G‘arbda mashhur bo‘lgan kontentni o‘zbek tiliga ham o‘girishni rejalashtirgan.

“Bundan tashqari, chet el kompaniyalari mahalliy kino ishlab chiqaruvchilar va studiyalar bilan o‘zbek filmlari va seriallarini o‘z platformalariga joylashtirish bo‘yicha hamkorlikni yo‘lga qo‘yishni maqsad qilgan”, — deydi u.

Eslatib o‘tamiz, “O‘zbektelekom” AK mamlakatda yetti yildan beri abonentlarga turli interaktiv servis xizmatlaridan foydalanish imkonini beradigan yangi avlod televideniyesi – IPTVni joriy etib kelayapti. Buning sharofati bilan nafaqat bir tomonli rejimda teleko‘rsatuvlarni tomosha qilish, balki ularni saqlab qo‘yish, o‘ziga qulay paytda qayta ko‘rish qulayliklari yaratilayapti. “Zamin” yangiliklarini “Telegram”da kuzatib boring