Oʻzbekiston va BAA oʻrtasida iqtisodiy sheriklikning yangi davri boshlandi

Oʻzbekiston va Birlashgan Arab Amirliklari (BAA) etakchilari iqtisodiy sheriklikning yangi davrini boshlashga kelishib olishdi, deya xabar berdi Oʻzbekiston prezidenti matbuot xizmati.

Abu-Dabidagi "Qasr ash-Shati" qarorgohida Oʻzbekiston prezidenti Shavkat Mirziyoyev va BAA prezidenti shayx Muhammad Ol Nahayon tor doirada hamda rasmiy delegatsiyalar a'zolari ishtirokida muzokara oʻtkazishdi.

Etakchilar iqtisodiy hamkorlikning yangi modelini, jumladan sun'iy intellekt, raqamlashtirish, "yashil" energetika, shaharsozlik va infratuzilma, turizm, xususiy biznes kabi 6 ta asosiy yoʻnalishni belgilab olishdi.

Har bir ustuvor soha boʻyicha alohida ishchi guruhlar tashkil etishga kelishildi.
“Tomonlar 2025-2027 yillarni "Oʻzbekiston va BAA oʻrtasidagi iqtisodiy hamkorlikning yangi davri" deb e'lon qilish taklifini qoʻllab-quvvatlashdi”, — deyilgan xabarda.

Shu ma'noda, 2030 yilga qadar oʻzaro savdo hajmini 10 barobarga koʻpaytirish va investitsiya portfelini 50 milliard dollarga etkazishga qaratilgan chora-tadbirlarni amalga oshirish asosiy vazifa etib belgilandi.

Oʻzbekiston ikki mamlakat ishbilarmon doiralari oʻrtasidagi aloqalarni yanada mustahkamlash va BAA kompaniyalarining yurtimizdagi investitsiyaviy faoliyatini kengaytirishdan manfaatdorligi qayd etildi.

Madaniy-gumanitar almashinuv koʻlamini oshirish masalalariga alohida e'tibor qaratildi.
“Davlatimiz rahbari Muhammad bin Zoid nomidagi universitet bilan hamkorlikda yuqori malakali kadrlar tayyorlash va sun'iy intellekt sohasida ilmiy tadqiqotlar olib borish boʻyicha qoʻshma dasturni ishga tushirishni taklif etdi”, — deyiladi xabarda.

Muzokaralar davomida boʻlajak oliy darajadagi tadbirlarga, shu jumladan, joriy yilda Samarqandda oʻtkaziladigan "Markaziy Osiyo - Koʻrfaz arab davlatlari hamkorlik kengashi" muloqotining ikkinchi sammitiga tayyorgarlik masalalari muhokama qilindi. “Zamin” yangiliklarini “Telegram”da kuzatib boring