O‘zbekistonda 46 darajagacha issiqlik: xavfli kunlar oldimizda

O‘zbekiston fuqarolari juda yuqori haroratdagi ob-havo oqimi haqida jiddiy ravishda ogohlantirildi. Favqulodda vaziyatlar vazirligi tomonidan berilgan ma’lumotlarga ko‘ra, 2025 yil 2–5 iyul kunlari mamlakat hududiga janub tomondan o‘ta issiq va quruq havo oqimlari kirib kelishi kutilmoqda.

Gidrometeorologik kuzatuv ma’lumotlariga asosan, 2 iyul kunidan boshlab O‘zbekistonning shimoliy, janubiy va cho‘l hududlarida havo harorati 40–43 darajagacha, ba’zi tuman va shaharlarda esa 44–46 darajagacha ko‘tarilishi ehtimoli mavjud. Bu issiq to‘lqinlar nafaqat fuqarolarning salomatligiga, balki qishloq xo‘jaligi, transport va energetika sohalariga ham salbiy ta’sir ko‘rsatishi mumkin.

3–5 iyul kunlari respublika bo‘ylab shamolning tezligi 13–18 m/s gacha, ayrim tumanlarda esa 20–25 m/s gacha kuchayishi, natijada chang va to‘zon bilan bog‘liq nomaqbul meteorologik sharoitlar yuzaga kelishi kutilmoqda. Bu holat ayniqsa nafas yo‘llari kasalliklari bo‘lgan shaxslar uchun xavfli bo‘lishi mumkin.

Favqulodda vaziyatlar vazirligi aholiga bir qator xavfsizlik tavsiyalarini e’lon qildi. Xususan, fuqarolardan quyoshning eng yuqori nuqtada bo‘ladigan paytida (soat 11:00–17:00 orasida) ochiq havoda yurmaslik, badanning yonishiga sabab bo‘ladigan kiyemlardan saqlanish, ko‘proq suyuqlik iste’mol qilish va quyosh nuridan himoyalovchi vositalardan foydalanish so‘raldi. Shuningdek, haydovchilardan avtomashinalarni daraxtlar, elektr ustunlari va bannerlar ostida qoldirmasliklari tavsiya etildi, chunki shamol natijasida ular qulab tushishi mumkin.

Quyosh nurining ortiqcha ta’siri bolalar, keksalar va surunkali kasalliklarga ega shaxslar uchun yanada xavflidir. Shu bois, shifokorlar bu toifadagi fuqarolarni issiq kunlarda uyda qolishga, salqin joylarda bo‘lishga va ovqatlanish tartibiga e’tibor berishga chaqiradi.

Ekologik va meteorologik mutaxassislar ta’kidlashicha, iyul oyi davomida O‘zbekistonda yog‘ingarchilik kutilmayapti, ya’ni butun oy davomida ob-havo quruq va juda issiq kechishi ehtimoldan xoli emas. Bu esa o‘rmon yong‘inlari, suv tanqisligi va qishloq xo‘jaligidagi ma’lum bir muammolarga sabab bo‘lishi mumkin.

Shuningdek, aholi elektr energiyasi va suvdan oqilona foydalanishga da’vat etilmoqda. Iyul oyida konditsionerlar, sovitgichlar, ventilyatorlar va boshqa issiqqa qarshi texnik uskunalar faol ishlashi natijasida elektr tarmoqlariga yuklama ortgan holda ishlaydi. Bu kabi sharoitlarda energiyani tejash nafaqat aholining iqtisodiy manfaati, balki umumiy tizim barqarorligi uchun ham muhimdir.

Mutaxassislar tomonidan so‘nggi yillarda ob-havo sharoiti keskin o‘zgarib, global isish alomatlari tobora yaqqol sezilayotgani ta’kidlanmoqda. Bu esa har bir insonni ekologik mas’uliyatni his qilish, tabiatni muhofaza qilish va issiq havo oqimlarining salbiy ta’sirini kamaytirish uchun zarur choralar ko‘rishga undaydi. “Zamin”ni Telegramʻda oʻqing!