Oliygoh tanlovi: 24 iyuldan abituriyentlar uchun muhim 15 kun boshlanadi

24 iyul – abituriyentlar hayotida hal qiluvchi sana. Bu kunda 2025–2026 o‘quv yili uchun belgilangan OTMga kirish test sinovlari yakunlanadi. Endi esa, navbat yangi, yanada mas’uliyatli bosqichda – oliy ta’lim yo‘nalishini va OTMni tanlashda. Davlat test markazi ma’lumotiga ko‘ra, bu jarayon uchun abituriyentlarga 15 kun vaqt berilgan. Ya’ni, taxminan 7 avgustgacha, qaysi universitetda, qaysi yo‘nalishda va qay tartibda o‘qishni belgilab olish kerak bo‘ladi.

Bu tizim so‘nggi yillarda shakllangan 2 bosqichli tartibga asoslangan:
– avval test, keyin OTM va yo‘nalish tanlovi.

Yangi bosqich: tanlash – imkoniyatni to‘g‘ri baholash demakdir
Abituriyentlar o‘z tanlovlarini my.uzbmb.uz saytida amalga oshiradilar. Bu yerda maxsus "Oliy va professional ta’lim muassasalariga qabul" bo‘limi mavjud bo‘lib, unda “OTM tanlash” jarayoni yo‘lga qo‘yilgan. Tizimdan foydalanish uchun abituriyent shaxsiy profiliga kirib, servisni ishga tushirishi kerak bo‘ladi.

U yerda ikki muhim tanlovni amalga oshirish kerak:
– “Tanlov ustuvorligi” (qaysi OTMlar va qaysi yo‘nalishlar birinchi o‘rinda turishi),
– “Maqsadli qabul” (agar davlat buyurtmasi asosida maxsus yo‘nalishda o‘qish niyati bo‘lsa).

Qancha OTM tanlash mumkin?
Abituriyent test topshirgan fanlar majmuasi va ta’lim tili asosida 5 tagacha OTM va yo‘nalishni tanlash imkoniga ega. Ularni bitta oliygoh doirasida ham, turli universitetlardan ham tanlash mumkin.

Tanlovlar kiritilgandan so‘ng, ma’lumotlarni “Saqlash” tugmasi orqali mustahkamlash talab qilinadi. Keyin abituriyent telefon raqamiga maxsus SMS-kod oladi va shu kod orqali o‘z tanlovini rasman tasdiqlaydi.

Qayd varaqasi – muhim hujjat
So‘nggi bosqichda avtomatik ravishda “Abituriyent qayd varaqasi” shakllantiriladi. Unda abituriyent tanlagan OTMlar, yo‘nalishlar, ta’lim shakllari to‘liq aks etadi. Uni yuklab olish va shaxsiy arxivda saqlab qo‘yish tavsiya etiladi. Qayd varaqasi – sizning rasmiy tanlovingizdir.

Tanlovni o‘zgartirish mumkinmi?
Ha. Tanlash jarayoni tugaguncha, ya’ni 7 avgustgacha, abituriyent o‘z tanlovini erkin o‘zgartirishi va qayta tasdiqlashi mumkin. Bu imkoniyat, ayniqsa, turli OTMlar qabul shartlarini bilib olgandan keyin juda foydalidir.

Yakuniy natijalar qachon e’lon qilinadi?
Abituriyentlar tomonidan tanlovlar to‘liq yakunlanganidan so‘ng, bir hafta ichida, taxminan 14 avgustgacha, rasmiy natijalar e’lon qilinadi. Kim qaysi oliygohga qabul qilingani Davlat komissiyasi qarori bilan ma’lum qilinadi.

Qabul kvotalari haqida eslatma
Avvalroq tasdiqlangan qarorga ko‘ra, 2025–2026 o‘quv yili uchun davlat OTMlarining kunduzgi ta’lim shakli bo‘yicha bakalavriat yo‘nalishlariga 35 500 o‘rin, magistratura uchun esa 9 922 o‘rin ajratilgan. Bu raqamlar tanlov qanday qizg‘in kechishini ko‘rsatib turibdi.

Abituriyent uchun tanlov – bu faqat OTM tanlash emas. Bu – kelajakdagi kasb, hayot yo‘li va imkoniyatlarni belgilashdir. Shoshilmasdan, lekin puxta tahlil bilan to‘g‘ri qaror qabul qilish har bir nomzodning zimmasidagi eng muhim vazifadir. “Zamin”ni Telegramʻda oʻqing!