O‘zbekistonda innovatsion rivojlanish va ilmiy salohiyatni oshirish maqsadida Innovatsion rivojlanish agentligi yosh olimlar uchun maxsus tanlov e’lon qildi.
Ma’lum qilinishicha, agentlik tomonidan tashkil etilgan tanlov yosh olimlarni xorijiy ilmiy va tadqiqot muassasalarida malakasini yanada mustahkamlash va ilmiy tajriba to‘plash uchun yuborishga qaratilgan. Ushbu tanlov O‘zbekiston Respublikasi Prezidentining 2024-yil 25-dekabrdagi PQ-455-son qarori hamda Vazirlar Mahkamasining 2021-yil 19-apreldagi 222-son qarori bilan tasdiqlangan nizom asosida amalga oshirilmoqda.
Tanlov natijasida saralangan yosh olimlar 2025-yil mobaynida AQSHning Texas universitetida 6 oylik ilmiy stajirovkada faoliyat yuritadilar. Ushbu stajirovka davomida ular aniq ilmiy vazifalarni bajarish, tadqiqot jarayonida yangi tajriba olish va malakasini yanada rivojlantirish imkoniyatiga ega bo‘ladi.
Nomzodlarni tavsiya qilish jarayoni Oliy ta’lim muassasalari hamda ilmiy tadqiqot tashkilotlari tomonidan amalga oshiriladi. Barcha hujjatlar faqat “internship.ilmiy.uz” yagona elektron platformasi orqali qabul qilinadi. Shu bilan birga, boshqa manzillar yoki pochta orqali yuborilgan hujjatlar rasman ko‘rib chiqilmaydi.
Tanlov jarayonida ma’lumotlarning to‘lig‘ligi va haqqoniyligini ta’minlash, shuningdek, tavsiya etilgan nomzodlarning stajirovkada qatnashishini kafolatlash mas’uliyati buyurtmachi tashkilot rahbari zimmasiga yuklanadi. Bu esa tanlovning shaffof va adolatli o‘tishiga xizmat qiladi.
“Zamin”ni Telegramʻda oʻqing!
