Moskvada bo‘lib o‘tgan xalqaro forumda “O‘zatom” agentligi rahbari Azim Ahmadxo‘jayev mamlakatda atom elektr stansiyasi qurilishi natijasida elektr energiyasi tannarxi pasayishi mumkinligini ta’kidladi. Uning fikricha, katta sarmoya kiritiladigan dastlabki bosqichdan keyin har bir kilovatt/soat quvvat ishlab chiqarish xarajatlari sezilarli darajada arzonlashadi.
“Quvvat qancha ortiq bo‘lsa, energiya ishlab chiqarish shunchalik optimallashadi. Bu esa aholi va iqtisodiyot uchun narxlarning ham pasayishiga olib keladi”, — dedi u.
Biroq iqtisodchi Otabek Bakirov bu fikrga shubha bilan munosabat bildirdi. Uning ta’kidlashicha, AES qurilishi ko‘pincha arzon elektr energiyasi va’dasi bilan asoslansa-da, amalda atom energiyasi gaz, shamol yoki gidro manbalardan qimmatroq turishi mumkin. Shuning uchun narxlarning tushishi haqidagi da’volar aniq izohga ega emas.
Ma’lumot o‘rnida, Jizzax viloyatining Forish tumanida kichik quvvatga ega atom elektr stansiyasi qurilish ishlari boshlangan. Loyihaga ko‘ra, stansiyani to‘liq ishga tushirish uchun kamida 7–8-yil vaqt talab etiladi.
Shu tarzda, mamlakatda AES qurilishi energiya ta’minotini diversifikatsiya qilish va barqarorlikka hissa qo‘shishi mumkin. Biroq elektr energiyasi narxlariga ta’siri borasida bahslar hali ham davom etmoqda.
“Zamin”ni Telegramʻda oʻqing!
