Agar siz Navoiy viloyatidagi qadimiy Sentob qishlog‘iga borsangiz, ko‘z oldingizda toshdan barpo etilgan uylar va inshootlar namoyon bo‘ladi. Bu joy shunchaki oddiy qishloq emas — tarix, madaniyat va tabiat uyg‘unligi aks etgan haqiqiy noyob maskandir. Ayni vaqtda Sentob turizm qishlog‘i maqomini olgan bo‘lib, mahalliy va xorijiy sayyohlarni o‘ziga tobora ko‘proq chorlamoqda.
Navoiy tog‘ bag‘rida joylashgan ushbu qishloqda qariyb uch ming aholi istiqomat qiladi. Sentob o‘zining so‘lim tabiati, boy madaniy merosi va saqlanib qolgan milliy qadriyatlari bilan mashhur. Bu yerga kelgan sayyohlar nafaqat go‘zal manzaralardan bahra olishadi, balki qadimiy sivilizatsiya izlariga ham guvoh bo‘lishadi.
Qishloqda yigirmaga yaqin mehmon uylari va uchta zamonaviy mehmonxona ishlab turibdi. Ular orqali kelgan mehmonlarga qulaylik va milliy mehmondo‘stlik taqdim etiladi. Eng qiziq jihatlardan biri — Sentob o‘zining tarixiy arxitektura ko‘rinishini saqlab qolgani. Shu bois bu yerga tashrif buyurgan odamlar qadim zamon odamlarining turmush tarzini his qilish imkoniga ega bo‘lishadi.
Sentobning yana bir o‘ziga xosligi — uning geografik joylashuvi. Qishloqdan 30 kilometr narida Aydarko‘l joylashgan bo‘lib, u Sentobning sayyohlik jozibasini yanada oshiradi. Katta ko‘l sohilida sakkizta o‘tov oromgohi barpo etilgan va ular bir vaqtning o‘zida uch mingdan ortiq sayyohni qabul qila oladi.
Rasmiy ma’lumotlarga ko‘ra, 2024-yil davomida Aydarko‘lga 70 mingdan ziyod xorijiy va 450 mingga yaqin mahalliy sayyoh tashrif buyurgan. Joriy yilda esa bu raqam biroz kamroq bo‘lib, 50 mingdan ziyod xorijiy va qariyb 200 ming mahalliy sayyoh kelgani qayd etilgan.
Sentob qishlog‘i bugungi kunda nafaqat Navoiy viloyatining, balki butun O‘zbekistonning eng qiziqarli turizm nuqtalari qatorida hisoblanmoqda. Tarix va tabiat uyg‘unlashgan bu maskan, shubhasiz, har bir tashrif buyurgan mehmonning xotirasida uzoq saqlanadi.
“Zamin”ni Telegramʻda oʻqing!
