O‘zbekiston prezidenti Shavkat Mirziyoyev 6 oktyabr kuni Ozarboyjon rahbari Ilhom Aliyev taklifiga binoan amaliy tashrif bilan Gabala shahriga yetib bordi. Gabala xalqaro aeroportida davlatimiz rahbarini Ozarboyjon madaniyat vaziri Odil Karimli, Gabala tumani ijro hokimiyati rahbari Sabuhi Abdullayev hamda qator rasmiylar samimiy kutib oldi.
Tashrif doirasida ikki davlat o‘rtasidagi strategik sheriklikni yanada mustahkamlash, xamkorlik loyihalarini jadallashtirish va mintaqaviy aloqalarni kengaytirish masalalari ko‘rib chiqilishi kutilmoqda. Xususan, sanoat kooperatsiyasi, transport-logistika («O‘rta yo‘lak» imkoniyatlari), energetika, «yashil» loyihalar, raqamlashtirish hamda madaniy-gumanitar yo‘nalishlarda qo‘shma dasturlar muhokama etiladi.
Rasmiy dasturga muvofiq, prezident Shavkat Mirziyoyev 7 oktyabr kuni Turkiy davlatlar tashkiloti sammiti tadbirlarida ishtirok etadi. Sammit doirasida OTB davlatlari rahbarlari bilan qator ikki tomonlama uchrashuvlar ham o‘tkazilishi, o‘zaro savdo aylanmasi va investitsion hamkorlikni oshirishga doir kelishuvlar imzolanishi ehtimol qilinadi.
O‘zbekiston va Ozarboyjon so‘nggi yillarda savdo hajmi, qo‘shma korxonalar soni va logistika yo‘nalishlari bo‘yicha barqaror o‘sish sur’atlarini namoyon etmoqda. Gabaladagi bu tashrif esa yuqori darajadagi siyosiy muloqotni amaliy natijalar bilan boyitishga qaratilgan navbatdagi qadam sifatida baholanmoqda.
“Zamin”ni Telegramʻda oʻqing! 
Ctrl
Enter
Xato topdIngizmi?
Iborani ajratib Ctrl+Enter tugmasini bosing Mavzuga oid yangiliklar
