O‘zbekistonda aholi uchun tabiiy gaz iste’moliga belgilangan bazaviy me’yor isitish mavsumida besh barobarga oshiriladi. Yangi qarorga ko‘ra, noyabrdan fevralgacha bo‘lgan oylarda har bir xonadon uchun oylik me’yor 500 kub metr qilib belgilandi. Bu o‘zgarish aholining qishki sharoitdagi ehtiyojlarini hisobga olgan holda joriy etilmoqda.
Amaldagi tartib bo‘yicha ilgari martdan oktyabrgacha gazning bazaviy me’yori oyiga 100 kub metr, isitish mavsumida esa 500 kub metr qilib belgilanadi. Endi bu me’yor nafaqat mamlakat bo‘ylab, balki ayniqsa sovuq havo ko‘p bo‘ladigan hududlarda — Qoraqalpog‘iston Respublikasi va Xorazm viloyatida ham oktyabrdan fevralgacha qo‘llaniladi. Bu hududlarda gazga bo‘lgan talab boshqalarga nisbatan yuqori ekani inobatga olingan.
Prezident qarori bilan aholining ijtimoiy himoyasini kuchaytirish maqsadida ehtiyojmand oilalarga elektr energiyasi va tabiiy gaz bo‘yicha kompensatsiyalar doimiy ravishda to‘lab boriladi.
Elektr energiyasi uchun — oyiga bazaviy me’yordan ortiq 150 kilovatt soatgacha, tabiiy gaz bo‘yicha esa — qish oylarida 250 kub metrgacha, yilning boshqa oylarida 150 kub metrgacha ortiqcha sarf uchun davlat kompensatsiya to‘laydi. Ilgari bu imtiyoz faqat qish oylarigagina taalluqli bo‘lgan bo‘lsa, endi u yil davomida har oy amal qiladi.
Shuningdek, yangi qarorga ko‘ra, 2025–2026 yilgi isitish mavsumi boshlanishidan oldin har bir ehtiyojmand oilaga bir million so‘m miqdorida moddiy yordam ajratiladi. Bu mablag‘lar asosan isitish tizimini tayyorlash, gaz ta’minotini yaxshilash va qish mavsumiga zarur zaxiralar yaratishga yo‘naltiriladi.
Mutasaddilarning ta’kidlashicha, bu o‘zgarishlar aholining real ehtiyojini qondirish, resurslarni tejamkorlik bilan taqsimlash hamda qishdagi energiya ta’minotida uzilishlarni oldini olishga qaratilgan.
Shu tariqa, yangi qaror nafaqat gaz iste’molchilari uchun yengillik yaratadi, balki ehtiyojmand qatlamlarning byudjet yukini kamaytirish orqali ularning turmush darajasini barqaror saqlab turishni ham ta’minlaydi.
“Zamin”ni Telegramʻda oʻqing!
