Bugun, 8 noyabr kuni ertalab soat 09:14 da O‘zbekiston hududida yer qimirlashi qayd etildi. Bu haqda Seysmoprognostik monitoring Respublika markazi ma’lum qildi.
Mutaxassislar ma’lumotiga ko‘ra, zilzilaning epimarkazi Toshkentdan taxminan 506 kilometr janubiy–g‘arbda, Buxoro viloyatining Gazli shahri yaqinida joylashgan. Yer qimirlashi chuqurligi 10 kilometrni tashkil etgan bo‘lib, uning magnitudasi 3,2 darajada baholangan. Epimarkazda sezilish kuchi 3 ball bo‘lgan.
Gazli shahrida zilzila kuchi 2 ball atrofida his qilingan. Hodisa vaqtli qayd etilib, hech qanday halokat yoki zarar haqida ma’lumot kelmagan.
Markazning xabar berishicha, bunday kuch darajasidagi yer qimirlashi asosan faqat kuchsiz silkinishlar bilan kechadi va aholi tomonidan yengil his etiladi. Ammo har qanday seysmik faollikda ehtiyot choralariga rioya qilish tavsiya etiladi.
Eslatib o‘tamiz, yaqinda Tojikiston hududida ham yer silkinishi sodir bo‘lib, uning tebranishlari O‘zbekistonning ayrim viloyatlarida ham sezilgandi.
“Zamin”ni Telegramʻda oʻqing!
