Vashingtondagi Oq uyda 6-noyabr kuni bo‘lib o‘tgan uchrashuv do‘stona va samimiy ruhda o‘tdi. O‘zbekiston prezidenti Shavkat Mirziyoyev AQSH rahbari Donald Tramp bilan muloqot chog‘ida mamlakatlar o‘rtasidagi munosabatlarni yanada mustahkamlashga qaratilgan bir qator tashabbuslarni muhokama qildi. Suhbat yakunlarida esa O‘zbekiston yetakchisi amerikalik hamkasbiga ikki ramziy sovg‘a — Samarqanddagi Registon majmuasining miniatyura nusxasi va Trampning o‘zbek tiliga tarjima qilingan “Kelishish san’ati” kitobini taqdim etdi.
Oq uy matbuot xizmati tarqatgan rasmlarda ko‘rinib turibdiki, bu sovg‘alar Tramp tomonidan katta qiziqish bilan qabul qilingan. Ayniqsa, Registonning kichik modeli — o‘zining tarixiy va madaniy ahamiyati bilan O‘zbekistonning ko‘p asrlik merosini ifodalaydigan belgi sifatida qimmatli ramz hisoblanadi. Prezident Mirziyoyev bu orqali ikki davlat o‘rtasidagi madaniy yaqinlik va o‘zaro hurmatni namoyon etdi.
Shuningdek, Trampga taqdim etilgan “Kelishish san’ati” (“The Art of the Deal”) asari o‘zbek tilidagi nashri davlat rahbarlarining muloqotiga o‘zgacha ma’no qo‘shdi. Bu kitob Trampning siyosiy va ishbilarmonlik tajribasini aks ettiradi, Mirziyoyev esa uni milliy tildagi nusxada taqdim etib, madaniy muloqot va kitobat diplomatiyasi orqali o‘zaro yaqinlikni yanada kuchaytirishga uringani kuzatildi.
Qiziq jihati shundaki, suratlarda Markaziy Osiyo – AQSH muloqoti doirasida Vashingtonga tashrif buyurgan boshqa davlat yetakchilari Trampga sovg‘a bergani ko‘rinmagan. Bu holat Mirziyoyevning tashrifini va uning shaxsiy tashabbusini yanada ajratib ko‘rsatdi.
Uchrashuvda Mirziyoyev Trampni takror va takror O‘zbekistonga tashrif buyurishga taklif etdi. Prezident so‘nggi yillarda har bir muloqotda amerikalik hamkasbiga Samarqandni ko‘rishni taklif qilib kelgan, bu gal esa rasman 2026-yildagi navbatdagi S5+1 sammitini Samarqand shahrida o‘tkazish tashabbusini ilgari surdi.
Mirziyoyevning bu taklifi AQSH rahbarining Markaziy Osiyoga ilk tashrifi bo‘lishi mumkin. Ta’kidlash joizki, hozirgacha biror AQSH prezidenti bu mintaqada rasmiy tashrif bilan bo‘lgani yo‘q. Shu bois, bunday qadam tarixiy ahamiyat kasb etadi.
Vashingtondagi muloqot nafaqat ikki davlat munosabatlarida yangi sahifa ochdi, balki O‘zbekiston diplomatiyasining yangi darajadagi faolligini ham ko‘rsatdi. Mirziyoyev tomonidan berilgan ramziy sovg‘alar mamlakatning madaniy qudrati va diplomatik muloyimligini ifodalab, Tramp bilan muloqotni do‘stona ruhda mustahkamladi.
Shu tariqa, Oq uydagi uchrashuv nafaqat siyosiy ahamiyat kasb etdi, balki o‘zbek an’anaviy mehmondo‘stligi va diplomatik samimiyatning yorqin namunasiga aylandi.
“Zamin”ni Telegramʻda oʻqing!
