O‘zbekistonda ortiqcha ish soatlari uchun haq to‘lash tartibi yangicha asosda belgilab olindi. Prezident tomonidan imzolangan yangi Qonun (O‘RQ–1095, 2025 yil 11 noyabr) mehnat munosabatlarini takomillashtirish va ishchi huquqlarini mustahkamlashga qaratilgan, deb xabar berdi Norma.uz.
Hujjatga ko‘ra, xususiy bandlik agentliklariga yangi imkoniyatlar yaratildi — ular endilikda kasb va xorijiy tillar bo‘yicha o‘quv kurslarini tashkil qilishi, chet el ish beruvchilar bilan hamkorlik qilishi va depozitdan olinadigan foiz daromadlarini mustaqil boshqarishi mumkin bo‘ladi.
Eng muhim o‘zgarishlardan biri — ish vaqtidan tashqari mehnatga oid cheklovning bekor qilinishi. Ilgari Mehnat kodeksida bu holat yiliga 120 soatdan oshmasligi lozim deb belgilangan edi. Endi esa ish beruvchi va xodim o‘rtasida kelishuv asosida bu soatlar cheklanmaydi.
Qonunga muvofiq, ish vaqtidan tashqari mehnat uchun haq quyidagicha belgilangan:
— dastlabki ikki soat uchun kamida 1,5 barobar;
— ikki soatdan ortiq ishlagan taqdirda kamida 2 barobar miqdorda maosh to‘lanadi.
Mutaxassislar fikricha, bu o‘zgarishlar mehnat munosabatlarini yanada ochiq-oshkora qilish, xodimlarning huquqlarini himoya etish hamda xususiy bandlik tizimi samaradorligini oshirishga xizmat qiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
