Milliy statistika qo‘mitasi ma’lumotlariga ko‘ra, 2024/2025 o‘quv yilida O‘zbekiston oliy ta’lim muassasalariga 381,7 mingdan ziyod talaba qabul qilingan. Bu raqam 2020/2021 yilga nisbatan 2,2 barobar ko‘pdir, deb xabar berdi qo‘mita matbuot xizmati.
Joriy o‘quv yilida qabul qilinganlarning 196,7 ming nafari qizlar, 185 ming nafari esa o‘g‘il bolalardir. Demak, oliy ta’limda tahsil olayotgan qizlar soni yigitlarnikidan 12 ming nafarga ko‘p.
Hududlar bo‘yicha eng ko‘p talaba Toshkent shahri hissasiga to‘g‘ri kelmoqda — bu yerda 155,2 mingdan ortiq yoshlar oliy ta’limda tahsil olmoqda. Keyingi o‘rinlarda Buxoro (31,5 ming), Toshkent viloyati (27 ming) va Samarqand (21,2 ming) viloyatlari joylashgan.
Eng kam ko‘rsatkich esa Sirdaryo viloyatida qayd etilgan — bu yerda hammasi 5,3 mingga yaqin talaba tahsil olmoqda. Shu bilan birga, Jizzax (6,3 ming), Navoiy (9,2 ming) va Andijon (12,5 ming) viloyatlarida ham talabalar soni nisbatan kam.
Mutahassislar fikricha, so‘nggi yillarda oliy ta’lim muassasalari sonining oshishi, qabul kvotalarining kengayishi va ta’lim imkoniyatlarining yaxshilanishi yoshlar orasida oliy ta’limga bo‘lgan qiziqishni sezilarli darajada kuchaytirdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
