O‘zgidrometning so‘nggi ma’lumotlariga ko‘ra, dekabrning ilk kunlari mamlakatimizda barqaror, quruq va nisbatan iliq ob-havo saqlanib turadi. 1–3 dekabr orasida respublikaning barcha hududlarida yog‘ingarchilik kutilmaydi, osmon ochiq bo‘lib, kunduzgi harorat asta-sekin ko‘tarilishi kuzatiladi.
Mutaxassislar aytishicha, 3 dekabr kuni aholi quyoshli va iliq ob-havodan bahra oladi — havo harorati kunduzi +13 darajagacha ko‘tarilishi kutilmoqda. Qish fasli boshlanganiga qaramay, bu kunlar bahorni eslatuvchi yengil iliqlik bilan o‘tadi.
Biroq ortidan ob-havo yana o‘zgarishi kutilmoqda. 4–5 dekabr kunlari respublikaga nam va biroz sovuq havo harakati kirib keladi. Bu vaziyat ayrim hududlarda o‘ziga xos o‘zgarishlarga sabab bo‘ladi:
– Shimoldan tashqari ko‘plab viloyatlarda yomg‘ir yog‘ishi mumkin.
– Tog‘ va tog‘oldi hududlarda esa yog‘ingarchilik aralash shaklda — yomgir va qor ko‘rinishida kuzatilishi ehtimol.
– Harorat kunduzi +6…+11 darajagacha pasayadi.
– Kechalari esa 1–5 dekabr davomida –3...+2 daraja atrofida bo‘lishi kutilmoqda.
Shamol asosan sharq yo‘nalishidan o‘rtacha tezlikda esadi, ayrim yerlarda tuman tushishi mumkin. Bu esa ertalabgi yo‘llarda harakat xavfsizligiga e’tiborni yanada oshirishni talab qiladi.
Toshkent shahrida ham o‘xshash manzara kuzatiladi. Poytaxtda 1–3 dekabr kunlari yog‘ingarchilik kutilmaydi, kunduzi havo +13…+15 darajagacha iliq bo‘ladi. Lekin 4–5-dekabrda tumanli va sokin ob-havo o‘rnini vaqti-vaqti bilan yog‘adigan yengil yomg‘ir egallaydi. Harorat kunduzi +8…+11 daraja, kechalari esa 0…+5 daraja bo‘lishi kutilmoqda.
Yuqoridagi holatlar dekabr boshi butun O‘zbekiston uchun ikki xil tabiatni o‘zida mujassam etganini ko‘rsatadi: avval iliq va quruq kunlar, ortidan esa sovuq va nam havo kirib kelishi. Tabiat o‘zgarishlari tez-tez almashib turgan bu kunlarda aholi ob-havo ma’lumotlarini diqqat bilan kuzatib borishi tavsiya etiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
