O‘zbekistondagi 38 ta oliy ta’lim muassasasi xalqaro ekologik barqarorlik bo‘yicha dunyoning eng nufuzli — top-1000 talik UI GreenMetric reytingida o‘z o‘rnini egalladi. Bu haqida Oliy ta’lim, fan va innovatsiyalar vazirligi matbuot xizmati qo‘shimcha ma’lumot tarqatdi.
5 dekabr kuni Tayvanda UI GreenMetric 2025 xalqaro ekologik barqaror universitetlar ro‘yxatining rasmiy natijalari e’lon qilindi. Ushbu tadqiqotda jahonning 105 mamlakatidagi 1745 ta universitet ishtirok etdi. Ular orasida O‘zbekistondan 79 ta OTM qatnashtirildi va shularning 38 tasi muvaffaqiyatli ravishda dunyoning “yashil” top-1000 taligiga kirdi.
Vazirlik ta’kidlashicha, mamlakatda 2025 yilning “Atrof-muhitni asrash va yashil iqtisodiyot yili” deb belgilanishi bilan uyg‘un holda, milliy universitetlarning ekologik tashabbuslardagi ishtiroki keskin faollashgan. Muassasalarda amalga oshirilayotgan o‘zgarishlar — barqaror infratuzilma, resurs tejamkorlik, yashil makonlarni ko‘paytirish va xalqaro standartlarga yo‘naltirilgan strategiyalar — yuksak baholarga sazovor bo‘lgan.
Rasmiy ma’lumotda shunday deyiladi:
“UI GreenMetric 2025 natijalari — universitetlarimizda ekologik javobgarlik va innovatsion yondashuvni mustahkamlash borasidagi qat’iy qadamlarimizning yorqin tasdig‘i hisoblanadi.”
Ma’lumot o‘rnida, UI GreenMetric — 2010-yildan buyon Indoneziya universiteti tomonidan o‘tkaziladigan global ekologik reyting bo‘lib, u oliygohlarning atrof-muhitga oid siyosatlari, energiya tejash dasturlari, chiqindilarni qayta ishlash, yashil infratuzilma va ta’lim-ilmiy faoliyatdagi ekologik yondashuvlarini baholaydi.
O‘zbekiston universitetlarining bunday natijasi mamlakatdagi “yashil” islohotlarning amalda samara berib borayotganidan dalolat beradi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
