Oʻzbekiston Sogʻliqni saqlash vazirligi yangi yil taʼtili arafasida butun tibbiy xizmat tizimini maxsus ish tartibiga oʻtkazishini maʼlum qildi. 31-dekabr ertalabidan 4-yanvar kuni yakunigacha mamlakat boʻylab barcha darajadagi davlat shifoxonalari — tuman poliklinikalaridan tortib respublika ilmiy-amaliy markazlarigacha — bemorlarni toʻxtovsiz qabul qiladi. Bu haqda upl.uz xabar beradi.
Ushbu rejimni ushlab turish uchun qariyb 20 ming nafar tibbiyot xodimi safarbar etildi. Maqsad — navbatchilik smenalarini barqaror ishlatish va xizmat koʻrsatishda uzilishlarga yoʻl qoʻymaslik. Tez yordam ham toʻliq quvvatda ishlaydi: hududlar kesimida 2,8 mingdan ortiq mobil brigada yoʻnalishlarga chiqarilishi rejalashtirmoqda. Respublika shoshilinch tibbiy yordam ilmiy markazi va uning filiallari esa 24/7 formatda favqulodda holatlarga doimiy shay turadi.
Ixtisoslashgan muassasalarda ham alohida xavfsizlik va uzluksizlik protokollari joriy etildi. Jumladan, 231 ta tugʻruqxona hamda 233 ta bolalar statsionari bayram kunlarida ham ishini toʻxtatmaydi — akusherlik va pediatriya yordami odatdagi tartibda davom etadi. Ommaviy sayillar vaqtida xavfsizlikni taʼminlaydigan huquq-tartibot xodimlari bilan tibbiyot muassasalari yaqin hamkorlikda ishlaydi. Vazirlik fuqarolarni bayram paytida sogʻligʻiga eʼtiborli boʻlishga va shifokor tavsiyalariga amal qilishga chaqirdi.
Oʻzbekistonda yangi yilning ilk kuni odatdagidek tugʻilishlar soni yuqori boʻladi: masalan, 2024-yil 1-yanvarda mamlakatda 1800 nafardan ortiq chaqaloq dunyoga kelgan. Shu bois tugʻruqxonalar aynan bayram kechasida resurslarni maksimal darajada jamlaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
