O‘zbekiston prezidenti raisligida Xavfsizlik kengashining mamlakat mudofaa qobiliyatini tubdan yuksaltirishga bag‘ishlangan kengaytirilgan majlisi bo‘lib o‘tdi. Davlatimiz rahbari sohadagi yutuqlarni sarhisob qilish bilan birga, zamonaviy xavf-xatarlarga qarshi turish uchun qurolli kuchlarni raqamli texnologiyalar va sun’iy intellekt asosida transformatsiya qilish zarurligini ta’kidladi.
Zamonaviy urush va yangi harbiy strategiya
Yig‘ilishda bugungi kunda mintaqaviy to‘qnashuvlarning ko‘lami kengayib, xalqaro huquq me’yorlari zaiflashayotgani qayd etildi. Oliy bosh qo‘mondon an’anaviy jang uslublari o‘tmishda qolayotganini alohida qayd etdi:
- Texnologik ustuvorlik: Endilikda g‘alaba askarlar soni yoki tanklar bilan emas, balki sun’iy intellekt, masofaviy boshqariladigan robot tizimlari va kibertexnologiyalar orqali ta’minlanadi.
- Proaktiv rejim: Har bir tizim xavflarni oldindan sezish va ularga tezkor javob qaytarish uchun «proaktiv ish rejimi»ga o‘tishi shart.
- Doktrinani yangilash: Vaziyat o‘zgarayotgani sababli 1997-yildagi Milliy xavfsizlik konsepsiyasi va sakkiz yil oldingi Mudofaa doktrinasini qayta ko‘rib chiqish topshirildi. Yangi hujjatda O‘zbekistonning harbiy bloklarga qo‘shilmaslik maqomi saqlab qolinadi.
«Muddatli xizmat – muvaffaqiyat yo‘li»
Prezident armiyani yoshlar uchun nafaqat jismoniy chiniqish, balki kelajakdagi kasbiy rivojlanish maydoniga aylantirish bo‘yicha inqilobiy yangiliklarni e’lon qildi:
- Kasb sertifikati: Askarlar 3-6 oylik dasturlar asosida kasbga o‘qitiladi va sertifikat oladi.
- IT-ta’lim: Har yili 5 ming askar «Bir million dasturchi» va sun’iy intellekt loyihalari doirasida malaka oshiradi.
- Ta’limdagi imtiyozlar: Xizmat davrida oliygohga imtihon topshirib, talaba bo‘lish imkoni yaratiladi. Oliygohga kirgan sobiq askarlarga foizsiz ta’lim kreditlari berilib, chet tili sertifikati xarajatlari qoplanadi.
- Ishga joylashish: Davlat xizmatiga kirishda 10 foizlik imtiyoz beriladi, tadbirkorlik kreditining 6 foizi davlat tomonidan to‘lanadi.
«Bir so‘z bilan aytganda, “muddatli harbiy xizmatni o‘tash – yoshlar uchun muvaffaqiyat yo‘li”ga aylanishi kerak, – dedi prezident.
«Mintaqaviy va global vaziyatni doimiy tahlil qilib borish, milliy armiyamizning salohiyatini mustahkamlash – bugungi kun talabi. O‘zbekiston armiyasi xalq himoyasiga doimo tayyor turishi, buning uchun tezkor, yuqori texnologiyali, yangi jang sharoitlariga mos bo‘lishi kerak», – dedi prezident.
Harbiy xizmatchilarni ijtimoiy qo‘llab-quvvatlash
Davlat rahbari vatan himoyachilarining mehnatini qadrlash maqsadida 1-apreldan boshlab maoshlar oshirilishini e’lon qildi:
- 1 apreldan boshlab Mudofaa vazirligi ofitserlariga ko‘p yillik xizmati uchun ustama miqdori 2 karra oshiriladi. Kontrakt asosida xizmat qilayotgan oddiy askar va serjantlarning oylik maoshi 10 foizga ko‘paytiriladi.
- Hududiy mudofaa ishlari boshqarmasi va bo‘limlarining harbiy bo‘lmagan xizmatchilarini oyligi bu yil 20 foizga, kelasi yili yana 50 foizga oshiriladi.
- Qurolli Kuchlar safida 30-yildan ortiq xizmat qilgan harbiylar uchun pensiya hisoblashda inobatga olinadigan oylik miqdori 75 foizdan 100 foizga yetkaziladi.
- Shuningdek, harbiylar uchun uy-joy qurilishi kengaytiriladi va pensiya ta’minoti bo‘yicha yangi qonun loyihasi ishlab chiqiladi.
«Harbiy xizmatchilar mehnatini qadrlash, ularning oila a’zolari va harbiy pensionerlarni ijtimoiy himoya qilish doimo diqqat-e’tiborimiz markazida bo‘lishi zarur, – dedi davlat rahbari va bu borada katta yangiliklarni e’lon qildi.
«Umuman, yangi doktrina armiyani texnologik yangilash va ilg‘or harbiy yechimlarni joriy etish uchun asos bo‘lib xizmat qilishi kerak», – dedi prezident.
Ma’naviyat va sport: Yangicha yondashuv
Harbiylarning ma’naviy olamini boyitish maqsadida barcha qismlarga jami 1 million nusxa badiiy kitob yetkaziladi. Kitobxonlik tanlovi g‘oliblarining xizmat muddati bir oyga qisqartirib beriladi. Sport yo‘nalishida esa an’anaviy musobaqalar qatoriga kibersport, dron va robot texnologiyalari bo‘yicha turnirlar qo‘shildi.
Davlatimiz rahbari yig‘ilish yakunida barcha vatan himoyachilarini Qurolli Kuchlar tashkil etilganining 34-yilligi bilan samimiy tabrikladi.
«Sizlarning jasoratingiz, qasamyodga sadoqatingiz, el-yurt himoyasi yo‘lidagi fidoyiligingiz bilan butun xalqimiz faxrlanadi. Go‘zal yurtimizda tinchlik-osoyishtalik va hamjihatlik doimo hukm sursin, jonajon Vatanimiz yanada mustahkam va barqaror bo‘lsin!» – dedi davlat rahbari.
Sizningcha, armiyada joriy etilayotgan kasbga o‘qitish tizimi yoshlarning kelajagiga qanday ta’sir ko‘rsatadi?
“Zamin”ni Telegramʻda oʻqing!
