Bugun “Ko‘mak” dasturi orqali chekka va olis hududlarda yoshlar uchun yangi imkoniyatlar ancha kengayyapti. Qayd etilishicha, dastur doirasida 130 million so‘mgacha foizsiz ssuda ajratish yo‘lga qo‘yilgani tufayli, so‘nggi olti oy ichida xorijiy til o‘rgatadigan 120 dan ziyod o‘quv markazi ish boshlagan.
Eng qizig‘i, bu markazlarni yo‘lga qo‘yib, amaliy tajriba to‘plagan yosh tadbirkorlar endi tashabbusni yanada katta qilib ko‘rmoqda. Ular atrofida IT va zamonaviy kasblar markazi, kutubxona, sport to‘garaklari kabi qo‘shimcha yo‘nalishlarni ham ochish taklifini beryapti. Ya’ni gap faqat tilda emas — butun boshli “rivojlanish muhiti”ni yaratish haqida ketyapti.
Ma’lum qilinishicha, “Ko‘mak” loyihasi orqali o‘z biznesini boshlab, yaxshi natija ko‘rsatayotgan yoshlarning faoliyatini kengaytirish uchun 300 million so‘mgacha foizsiz ssuda berish tizimi ham yo‘lga qo‘yiladi. Bu — ishlab ketgan loyihani to‘xtatib qo‘ymasdan, yanada katta darajaga olib chiqish uchun “ikkinchi nafas” degani.
Soliqlarda ham yengillik bor. Endi olis hududlardagi o‘quv markazlari ijtimoiy soliqni 1 foiz miqdorida to‘laydi. U yerdagi o‘qituvchilarning daromad solig‘i 7,5 foiz qilib belgilanyapti. Solishtirish uchun: hozir ijtimoiy va daromad solig‘i 12 foizdan to‘lanadi. Demak, qonunchilik tomonidan markazlar ham, o‘qituvchilar ham “yengilroq nafas olishi” uchun sharoit qilinmoqda.
Shuningdek, Yoshlar ishlari agentligiga xususiy o‘quv markazlari bilan hamkorlikda yiliga 20 ming nafar yoshni kelajak kasblariga o‘qitish dasturini ishga tushirish vazifasi qo‘yildi. Bundan tashqari, har bir tumanga 500 million so‘mgacha ssuda ajratib, texnikum va o‘quv markazlarida kasb-hunar laboratoriyalarini tashkil qilish topshirildi.
Xulosa oddiy: chekka hududlarda ham til, IT va zamonaviy kasblar “faqat markazda bo‘ladigan narsa” emas. “Ko‘mak” dasturi shu fikrni amalda isbotlayapti — endi eng muhimi, bu markazlar barqaror ishlab, yoshlarga haqiqiy natija bersin.
“Zamin”ni Telegramʻda oʻqing!
