O'zbekiston startap va venchur ekotizimi jadal rivojlanishda davom etmoqda. IT Park Ventures jamg'armasi ma'lumotlariga ko'ra, o'tgan yili mamlakatimiz startap muhiti 132 foizdan ortiq o'sishni qayd etdi. Buning natijasida O'zbekiston ilk bor StartupBlink Global Startup Ecosystem Index reytingining kuchli 100taligidan joy oldi. Bu haqda the-tech.kz xabar beradi.
Venchur bitimlari hajmi ham sezilarli darajada oshdi. Agar 2024 yilda bu ko'rsatkich 69,5 million dollarni tashkil etgan bo'lsa, 2025 yilda sarmoyalar hajmi 329 million dollardan oshib ketdi. IT Park Ventures jamg'armasi 10 million dollar kapital bilan ish boshlagan bo'lib, bir yil davomida 500 dan ortiq loyihani saralab oldi.
Bugungi kunda jamg'arma portfelida 15 ta davlatda faoliyat yuritayotgan 70 ga yaqin startap mavjud. Investitsiyalarning asosiy qismi, ya'ni 25 foizi FinTech sohasiga yo'naltirilgan. Shuningdek, EdTech, HR Tech, SaaS hamda sun'iy intellekt yo'nalishlari ham investorlar e'tiborida qolmoqda. Loyihalar 500 Global va Plug and Play kabi xalqaro hamkorlar bilan birgalikda moliyalashtirilgan.
2026 yilda jamg'arma o'z faoliyatini yanada kengaytirishni maqsad qilgan. Kelgusi yilda sun'iy intellekt, GameDev va boshqa texnologik yo'nalishlarga ustuvorlik beriladi. Shuningdek, xalqaro hamkorlar bilan birgalikda yangi venchur jamg'armalarini tashkil etish va startaplarning global bozorga chiqishiga ko'maklashish rejalashtirilgan.
“Zamin”ni Telegramʻda oʻqing!
