Raqamli texnologiyalar hayotimizning ajralmas qismiga aylanib ulgurdi. Bugungi kunda nafaqat kattalar, balki kichiklarning ham qo‘lida kamida bitta aloqa vositasi mavjud. Milliy statistika qo‘mitasi tomonidan taqdim etilgan yangi maʼlumotlar yurtimizda mobil qurilmalar soni hayratlanarli darajada ortib borayotganini кўрсатди. Zamin.uz jamoasi ushbu qiziqarli statistik raqamlarni tahlil qiladi.
Telefonlar soni: 15 yillik shiddatli o‘sish
Statistik maʼlumotlarga nazar tashlasak, so‘nggi o‘n besh yil ichida o‘zbek xonadonlarida mobil qurilmalar soni qariyb uch barobarga ko‘payganini ko‘rishimiz mumkin. Aholining aloqa vositalariga bo‘lgan ehtiyoji yil sayin barqaror ravishda yuksalib bormoqda:
- 2010 yilda: 100 ta uy xo‘jaligiga o‘rtacha 145 ta telefon to‘g‘ri kelgan.
- 2015 yilda: Ko‘rsatkich sezilarli oshib, 234 tani tashkil etgan.
- 2020 yilda: Har yuzta oiladagi qurilmalar soni 287 taga yetgan.
- 2025 yilda: Joriy holatga ko‘ra, bu raqam rekord daraja — 359 taga ko‘tarildi.
Bu shuni anglatadiki, hozirda yurtimizdagi har bir xonadonda o‘rtacha 3-4 tadan mobil telefon mavjud. Bu esa aholining raqamli xizmatlardan foydalanish imkoniyati naqadar kengayganidan dalolat beradi.
Import ko‘rsatkichlari ham yuqori
Mobil qurilmalarga bo‘lgan yuqori talab import hajmida ham o‘z aksini topmoqda. Avvalroq xabar berganimizdek, birgina 2026 yilning dastlabki ikki oyi (yanvar-fevral) davomida O‘zbekistonga dunyoning 13 ta davlatidan jami 909 951 dona telefon olib kelingan. Bu esa bozordagi taklif va xarid qobiliyati hamon yuqori ekanini tasdiqlaydi.
Bu shunchaki statistika emas
Mobil aloqa vositalari sonining bu qadar ko‘payishi mamlakatimizdagi raqamli transformatsiya jarayonlarining tezligini ko‘rsatadi. Endilikda telefon nafaqat so‘zlashish, balki taʼlim olish, biznes yuritish va davlat xizmatlaridan foydalanish uchun asosiy vositaga aylandi.
Aziz mushtariylar, sizning xonadoningizda oilangizning har bir aʼzosiga nechtadan telefon to‘g‘ri keladi? Siz uchun telefonning qaysi jihati eng muhim: kamerasimi, xotirasimi yoki brendi?
“Zamin”ni Telegramʻda oʻqing!
