Shavkat Mirziyoyevga O‘zbekiston Qurolli kuchlari oliy bosh qo‘mondoni sifatida harbiy xizmatchilarni ijtimoiy qo‘llab-quvvatlash, rezerv va zaxira ofitserlar tayyorlash tizimini takomillashtirish hamda 9 may – Xotira va qadrlash kuniga tayyorgarlik ishlari yuzasidan axborot taqdim etildi.
Rejaga ko‘ra, joriy yilda Ikkinchi jahon urushi qatnashchilari va nogironlariga 30 million so‘m miqdorida bir martalik pul mukofoti to‘lanishi taklif qilinmoqda. Bu qaror urush faxriylariga bo‘lgan eʼtiborni yana-da kuchaytirishga qaratilgan.
Shu bilan birga, bayram kunlari urush qatnashchilari, front orti mehnat faxriylari, keksalar hamda ustozlarga alohida hurmat ko‘rsatish, yolg‘iz va kam taʼminlangan faxriylarning uy-joylarini obodonlashtirish, xotira tadbirlarini keng miqyosda tashkil etish rejalashtirilgan.
Mustaqillik yillarida xizmat burchini ado etish chog‘ida halok bo‘lgan Vatan himoyachilari xotirasi ham ulug‘lanadi. Ularning oila aʼzolariga moddiy va maʼnaviy yordam ko‘rsatish choralari ham tizimli ravishda davom ettiriladi.
Mudofaa tizimidagi ijtimoiy qo‘llab-quvvatlash doirasida ofitserlarga xizmat yillari uchun beriladigan oylik ustamalar ikki barobarga oshiriladi. Kontrakt asosida xizmat qilayotgan askar va serjantlarning oylik maoshi esa 10 foizga ko‘paytiriladi.
Hozirgi kunda 4 ta oliy taʼlim va 2 ta oliy harbiy taʼlim muassasalarida 42 ta yo‘nalish bo‘yicha rezerv ofitserlar tayyorlanmoqda. Shuningdek, Urganch, Termiz, Andijon davlat universitetlari, Samarqand iqtisodiyot va servis instituti hamda Andijon davlat tibbiyot instituti bazasida yana 5 ta harbiy tayyorgarlik markazi tashkil etilishi rejalashtirilgan.
Bundan tashqari, davlat oliy taʼlim muassasalarida «chaqiriqqacha harbiy taʼlim» yo‘nalishi asosida 3 yillik bakalavriat tizimi joriy etilib, rezerv va zaxira ofitserlar tayyorlash kengaytiriladi. Harbiy tibbiyot institutida esa klinik ordinatura va magistratura bosqichlariga qabul qilingan talabalar uchun maxsus harbiy tayyorgarlik imkoniyati yaratiladi, bu tizim nodavlat oliy taʼlim muassasalariga ham tatbiq etiladi.
Yangilangan yondashuv mamlakat mudofaa salohiyatini mustahkamlash va harbiy xizmatchilarni qo‘llab-quvvatlash tizimini yangi bosqichga olib chiqishga qaratilgan.
“Zamin”ni Telegramʻda oʻqing!
