O‘zbekistonliklar ko‘proq qaysi sohalarda mehnat qilmoqda?
O‘zbekistonda band bo‘lgan aholining eng katta qismi qishloq, o‘rmon va baliq xo‘jaligi sohasida (3,1 milliondan ortiq kishi) mehnat qilmoqda. Keyingi o‘rinlarni ishlab chiqarish sanoati, savdo, qurilish va ta’lim sohalari egallab, ularning har birida bir milliondan ziyod fuqaro faoliyat yuritadi. Axborot-kommunikatsiya, moliya va sug‘urta kabi yo‘nalishlarda bandlik ko‘rsatkichlari nisbatan pastroq ekanligi qayd etilgan. Mamlakat aholisining 38 milliondan oshishi mehnat bozorida turli sohalar bo‘yicha ishchi kuchiga bo‘lgan yuqori ehtiyojni ko‘rsatmoqda.
O‘zbekistonda band bo‘lgan aholining asosiy qismi qishloq xo‘jaligi yo‘nalishida faoliyat yuritmoqda. Bu haqda Milliy statistika qo‘mitasi tomonidan e’lon qilingan ma’lumotlarda qayd etildi.
Rasmiy statistikaga ko‘ra, mamlakatda iqtisodiy faol aholi turli sohalar bo‘yicha taqsimlangan bo‘lib, eng katta ulush qishloq, o‘rmon va baliq xo‘jaligi zimmasiga to‘g‘ri keladi. Ushbu yo‘nalishda 3 million 132,6 ming nafar fuqaro mehnat qilmoqda.
Keyingi o‘rinlarda ishlab chiqarish sanoati turadi. Mazkur tarmoqda 1 million 699,6 ming kishi band. Savdo sohasi ham yirik ish beruvchi yo‘nalishlardan biri bo‘lib, ulgurji va chakana savdoda 1 million 507,9 ming nafar fuqaro ishlamoqda.
Qurilish tarmog‘ida 1 million 450,5 ming kishi mehnat qilsa, ta’lim sohasida 1 million 367,6 ming nafar mutaxassis faoliyat yuritmoqda. Sog‘liqni saqlash va ijtimoiy xizmatlar yo‘nalishida esa 719,4 ming kishi ishlamoqda.
Shuningdek, davlat boshqaruvi va mudofaa tizimida 637 ming kishi band bo‘lib, transport va saqlash sohasida 584,6 ming nafar fuqaro faoliyat olib bormoqda. Yashash va ovqatlanish xizmatlarida 389,5 ming kishi mehnat qilmoqda.
Qolgan sohalarda bandlik nisbatan kamroq bo‘lib, professional va ilmiy faoliyatda 152,6 ming, axborot va aloqa sohasida 108,8 ming, moliya va sug‘urta yo‘nalishida esa 82,9 ming kishi ishlaydi.
Energetika, ko‘chmas mulk, madaniyat va dam olish, tog‘-kon sanoati hamda kommunal xizmatlar kabi tarmoqlarda ham minglab fuqarolar band.
Statistikaga ko‘ra, 2026 yil 1 aprel holatiga O‘zbekistonning doimiy aholisi soni 38 million 382 ming 685 kishini tashkil etgan. Bu esa mehnat bozori hajmining kengligini va turli sohalarda ishchi kuchiga ehtiyoj yuqoriligini ko‘rsatadi.
Izohlar 0
…