O‘zbekistonlik bo‘lmagan o‘zbek yoshlarining Shavkat Mirziyoyevga ochiq xati

O‘zbekiston prezidenti Shavkat Mirziyoyev janoblariga !

Hurmatli Shavkat Miromonovich!

Biz O‘zbekistonlik bo‘lmagan dunyo o‘zbeklari yoshlari sizga murojaat qilmoqdamiz!

O‘tmishimizdan ma’lumki, Oqposhsho va sovet bosqinining ayanchli davrlari, terror balosi, Afg‘oniston va Pokistondagi urushlar hozirda 50 milliondan ortiq bo‘lgan o‘zbek millatini har erga parchalab yubordi!

Bugunimizda O‘zbekistondan tashqarida 20 milliondan ortiq o‘zbek millatiga mansub insonlar yashamoqdalar.

Hurmatli Yurtboshi! Afg‘oniston va pokistonlik o‘zbeklarimizning ahvollari havas qiladigan darajada emas. O‘zingizga ma’lumki, Afg‘onistondagi va Pokistondagi terror balolari, urushlar Afg‘oniston va Pokiston o‘zbeklarini dunyo o‘zbeklaridan ancha vaqtga uzib qo‘ygandi .

Tangriga shukur, O‘zbekistonimiz ham erkinlikka erishishi bilan dunyo o‘zbeklariga yordam qo‘lini cho‘za boshladi. Xususan, Afg‘onistonda O‘zbekiston nomidan maktablar qurib berildi, Qirg‘izistonda esa sizning buyrug‘ingiz bilan O‘zbekiston hukumati O‘sh shahrida o‘zbeklarga maktab qurib bermoqda, biz bundan minnatdormiz.

Janob Yurtboshi. Shukur, oxirgi davrlarda dunyo o‘zbeklari bir-birlarini izlamoqdalar, qaytadan aloqalarni tiklamoqdalar.

Dunyo o‘zbeklarining yaqinlashishida, albatta, 1996 yili O‘zbekistonning birinchi Prezidenti tomonidan lotin alifbosi rasman qabul qilinishi asosiy rol o‘ynadi!

Biz lotin yozuvi orqali Otayurtimiz O‘zbekistonga qayta bog‘lana oldik!

Mana shu xayrli ish tufayli lotin alifbosi joriy bo‘lgandan keyin madaniy aloqalar O‘zbekistondan boshqariladigan onlayn-portallar va kutubxonalar tufayli qaytadan tiklandi. Afg‘onistondagi 10 millionga yaqin o‘zbeklarda va boshqa davlatdagi o‘zbeklarda til va o‘zlikni kuchaytirish uchun yangi umid tug‘ildi. Har kuni afg‘onistonlik yuzdan ortiq o‘zbeklar lotin alifbosi tufayli, o‘zlarining ona tiliga bo‘lgan cheksiz sevgisi va talabi tufayli mana shu onlayn-kutubxona va onlayn-portallardan foydalana boshladi.

Biz O‘zbekistonda tug‘ilmagan o‘zbeklar kuni kecha o‘zbekistonlik bir adabiyotshunos kirill yozuviga qaytaylik, degan ochiq xatni sizning qabulxonangizga yuborganini eshitib, haqiqatan, yana ma’naviy aloqamiz uziladi, degan xavotirga bordik.

Janob Prezident! Afg‘onistonda o‘zbek tili ta’lim tizimi 0 foizga tengligi sabab arab va fors tillariga qorishib, yo‘q bo‘lib ketish arafasida qolgan paytda biz lotin yozuvi bilan internet resurslari orqali O‘zbekiston va boshqa erlik o‘zbeklar bilan aloqani tikladik, tilimizni ham mana shu internet orqali qayta o‘rganmoqdamiz! Lotin yozuvidagi elektron kitoblar bilan buyuk ajdodlarimiz asarlarini o‘qib bormoqdamiz!

Shavkat Miromonovich, sizdan hurmat va adab ila istaymizki, lotin alifbosi O‘zbekistonda yagona yozuv bo‘lsin, dunyo o‘zbeklari ila O‘zbekiston o‘zbeklari orasidagi rishta uzilmasin!

Sizga taklif qilingan kirill yozuvini qaytadan O‘zbekistonda rasmiy yozuv qilish istagida bo‘lganlarga rad javobini berib, o‘zbekistonliklar va butun dunyo o‘zbeklariga qulay bo‘lgan o‘zbek lotin alifbosini yana qayta mukammal qilib yaratishingizni iltimos qilib qolamiz!

Hurmat bilan O‘zbekistonda tug‘ilmagan o‘zbek yoshlari:

Xayir Saljuqiy - Afg‘oniston

Bahrom Bahruddin Bahoiy - Afg‘oniston

Asadulloh Erkin - Afg‘oniston

Javlon Anvarov - Qirg‘iziston

Rahmonjonov Bahrom - Qirg‘iziston

Zikrillo Mirzaev - Qozog‘iston

Hamdam Hoshim - Afg‘oniston

Xolyor Aminxon - Afg‘oniston

Abdulhamid Pardaev - O‘zbekiston

Otabek Umar - O‘zbekiston

Hayir Muhammad Ulus - Pokiston

Nazarbek - Saudiya Arabistoni

Mohib Hamidiy - Afg‘oniston

Rozia Sharan - Afg‘oniston

Husamuddin To‘yg‘on - Afg‘oniston

Alim Ko‘hkan - Afg‘oniston

Nodir Hikmat Kuleli - Turkiya


Manba: Sof.uz “Zamin” yangiliklarini “Vkontakti”da kuzatib boring