Otabek G‘ulomxo‘jayev: "Hojimat Erkinov legioner bo‘lishga tayyor edi"

Yaqinda yurtimiz yashil maydonlari mezbonlik qilgan U-23 Osiyo Kubogida ajoyib o‘yinlar ko‘rsatgan Hojimat Erkinov legionerga aylanmoqda.
21 yoshli vinger faoliyatini Moskvaning "Torpedo" jamoasida davom ettiradi. Bu borada ekspert sifatida yoshlar murabbiyi Otabek G‘ulomxo‘jayevning fikrlari bilan qiziqdik.

"Yigitlarni o‘ziga ham aytdim. Osiyo Kubogida muvaffaqiyatli ishtirok etishdi. Parij Olimpiadasiga tayyorlanayotgan jamoa Osiyo Kubogi orqali katta tajriba orttirdi. Hojimat Erkinov, Husayn Norchayev, Jasur Jaloliddinovga prezidentimizning bergan e’tibori yaxshi bo‘ldi. Qolgan futbolchilar ham shunga qarab intilishadi. Hojimatni ketishiga kelsak, ko‘rinib turibdiki, darajasi O‘zbekiston chempionati darajasidan o‘sgan.

U bilan ko‘p muloqot qilaman. Pul ishlash bo‘yicha unda zo‘r takliflar bor edi. Ustozlari bilan maslahatlashib, pulni emas, trampolinni, futbolchi sifatida o‘sadigan klubni tanladi. Muhimi, u yerda o‘yinini topib olib, 1-2 yilda ko‘zga ko‘rinadigan holatga kelishi kerak. Rossiya chempionati ajoyib tanlov.

O‘ylaymanki, mentalitetga ko‘nikib ketadi. Tabiatan og‘ir-bosiqdek ko‘rinadi. Birinchi murabbiyi Stanislav Kudryashov bo‘lgan. Moslashishda, tilda muammo bo‘lmaydi. Juda kirishimli bola. Ketishidan oldin prezident qo‘lidan medal olish katta motivatsiya beradi. Mas’uliyatni his qiladi.

Xojimat individual kuchli futbolchi. Yo‘q joydan o‘yinni kuchaytiradi. Jamoaviy o‘yin chiqmagan pallada individual harakatlari bilan natija keltira oladi. Uning uchun xursandman. Qaysidir ma’noda Hojimat legioner bo‘lishga tayyor edi", – dedi mutaxassis. “Zamin” yangiliklarini “Twitter”da kuzatib boring