Gulruxbegim Tohirjonova oʻzbekistonlik raqibga qarshi dona surishdan bosh tortdi

^{Gulruxbegim Tohirjonova / Foto: Oilaviy arxiv}
Xalqaro shaxmat olimpiadasining qizlar oʻrtasidagi bahslari 2-turida Oʻzbekiston va AQSh terma jamoalari toʻqnash keldi. Musobaqada AQSh nomidan qatnashayotgan oʻzbekistonlik Gulruxbegim Tohirjonova hamyurtlariga qarshi oʻynashni istamadi. Hindistonning Chennai shahrida shaxmat boʻyicha 44-jahon olimpiadasi boshlandi.

29 iyulda boʻlib oʻtgan birinchi turda Oʻzbekiston erkaklar terma jamoasi – Nodirbek Abdusattorov (2004 yil), Nodirbek Yoqubboev (2002 yil), Javohir Sindorov (2005 yil) va Shamsiddin Vohidov (2002 yil) nepallik raqiblari ustidan gʻalabaga erishdi: Oʻzbekiston – Nepal 4:0.

^{Oʻzbekistonlik yigitlarning barchasi – grossmeysterlar (GM). Qatnashchilarning familiyasi yoniga ularning FIDE reytingi yozilgan.}
Umida Omonova (2006 yil), Afruza Hamdamova (2009 yil), Maftuna Bobomurodova (2006 yil) va Marjona Malikova (2002 yil)dan iborat Oʻzbekiston ayollar terma jamoasi ham ganalik raqiblarini magʻlub etdi: Oʻzbekiston – Gana 4:0.

^{Oʻzbekistonlik qizlardan uch nafari FIDE ustasi unvoniga ega.}
Bugun 2-turda oʻzbekistonlik shaxmatchi yigitlar Farer orollari, qizlar esa AQSh terma jamoasiga qarshi dona surmoqda.

Kun.uz manbasining ma'lum qilishicha, olimpiadaning 2-turida Oʻzbekiston terma jamoasi vakili Nilufar Yoqubboeva AQSh terma jamoasi nomidan ishtirok etayotgan oʻzbekistonlik Gulruxbegim Tohirjonovaga qarshi dona surishiga toʻgʻri kelgan.

“Biroq Gulruxbegim oʻyinni rad qilib, Oʻzbekistonga qarshi oʻynamasligini aytdi. Endi 2-turda uning oʻrniga Irina Krush oʻynaydi. Balki mardlikdir, lekin alamli va ta'sirli ekani aniq”, – deydi suhbatdosh.

Ayni paytgacha Nilufar Yoqubboeva va Marjona Malikova amerikalik raqiblarga imkoniyatni boy berdi, yana ikkita oʻyin davom etmoqda. Ma'lumot uchun, AQSh terma jamoasi jahon tasnifida 7-, Oʻzbekiston esa 46-pogʻonadan joy olgan.

Yigitlar oʻrtasida esa Abdusattorov va Yoqubboev farerlik shaxmatchilarni magʻlub etdi, keyingi ikkita stolda ham ustunlik oʻzbekistonliklar tarafida.

Eslatib oʻtamiz, Gulruxbegim Tohirjonova – oʻzbekistonlik qizlar ichida xalqaro grossmeyster unvonini olgan ikkinchi shaxmatchi. U 2020 yilda, 21 yoshida AQShga joʻnab ketgan, keyinchalik ketishiga Oʻzbekiston shaxmat federatsiyasidagi adolatsizliklar, xususan federatsiya raisining birinchi oʻrinbosari Husan Turdialiev sabab boʻlganini aytgandi.

Gulruxbegim oʻtgan yili AQSh chempionatida ikkinchi oʻrinni qoʻlga kiritib, AQSh terma jamoasidan joy olgan. “Zamin” yangiliklarini “Telegram”da kuzatib boring