«Qogʻoz berib, xohlagan raqamingni yoz deyishdi». Otabek Shukurov bilan intervyu

Oʻzbekiston milliy jamoasi yarimhimoyachisi Otabek Shukurov 5 yillik faoliyatidan keyin yozgi transfer oynasida «Sharja»dan «Fotih Karagyumruk» klubiga oʻtdi. 26 yoshli futbolchining Birlashgan Arab Amirliklaridan Turkiya Superligasiga koʻchib oʻtishi oldinga tashlangan qadam ekani shubhasiz. Ayniqsa, oʻzbek yarimhimoyachisining Andrea Pirlo qoʻl ostida toʻp surishi barchani xursand qiladi. Otabek Shukurov Turkiyada Tribuna.uz va Kun.uz muxbiriga ilk eksklyuziv intervyu berdi.

«Sharja»dan ketishi va Evropa klubiga oʻtish maqsadi

- Hali Turkiyaga kelganimizga ikki kun boʻldi. «Sharja»dan «Fotih Karagyumruk»ga oʻtishim maqsadim bilan bogʻliq. Avvaldan Evropada toʻp surishni istaganman, Turkiyada esa Evropada nom taratgan kuchli klublar bor. «Sharja» bilan oldindan shu masalani muhokama qilib kelganmiz. Oxirgi shartnomalarimda ham shunday band kiritgandikki, Turkiya, Rossiya yoki kuchli beshlik chempionatlaridan taklif boʻlsa, «Sharja» meni qoʻyib yuborishi talab etilardi. Shunga asosan BAA klubini tark etib, Turkiyaga keldim.

«Fotih» klubi dastlab agentimga taklif bergan, keyin esa «Sharja»ga rasmiy taklif bilan chiqqan. «Sharja» rahbariyati esa ketmasligimni xohlab, hatto menga aytmagan. Bu narsani keyin bilib oldik. Shu bir oy ichida boʻlgan bu. Agentim ham taklifni aytib turgandi.

Nega aynan «Fotih Karagyumruk»ni tanladi?

- Turkiyaning bu jamoasidan tushgan taklif meni shu jihati bilan e'tiborimni tortdiki, bu klub bosh murabbiyi – Andrea Pirlo ekani bilan bogʻliq edi. Chunki faoliyatimdagi choʻqqimni Evropada toʻp surish deb maqsad qilganman. «Sharja»ga oʻtishim ham oʻzi ayrim sabablar bilan roʻy bergan va bu erda qolib ketdim. Lekin hammasi Allohdan, nasib qilgani boʻladi, baribir. Biz amalini, harakatini maksimal darajada qilib kelganmiz har doim, qolganini Xudoga tavakkal qilganmiz. Mana, Turkiyaga oʻtish nasib qilgan ekan. Tezroq moslashib olishga intilyapmiz.

«Sharja»dan ketish ham oson boʻlmadi. Ular majbur qoʻyib yuborishdi. Bu klubda 4-5 yil oʻynab, nafaqat klub rahbariyati, xodimlar, muxlislar, umuman butun Sharja bilan juda yaqin boʻlib qolgandik. «Sharja» rahbariyatidan boshqa takliflar borligi, BAA va Saudiya Arabistoni klublari ham chaqirayotgani, ammo yanada oʻsish uchun ham Evropaga oʻtishga ruxsat beringlar deb soʻradim.

Pirlo qoʻl ostida oʻynash uchun nimalardan voz kechgani haqida

- Pirlo jamoasiga oʻtish uchun nimalardan voz kechdim? Toʻgʻrisini aytsam, bugunlardan oʻzimga keldim. Chunki futbolchi uchun 4-5 yil kichik vaqt emas. 21 yoshimda Sharjaga kelgan boʻlsam-da, bu erdan juda koʻp narsa topganman. Faqat moliyaviy tarafdan emas, futbolchi sifatida 100ga yaqin davlatda boʻlganman, ammo Sharjadagidek yashash muhiti, menga mos joyni topish qiyin. Bu shahardagi islomiy muhitdan koʻp narsa oldim. Sharjada meni taniydigan insonlar borki, yaxshi koʻrardi. Yoshi kattalari hatto «oʻgʻlim» derdi. Klubdan ketganimga ular ishonmay, hammasi yozishmoqda. Bunday qadriyatlarni soʻz bilan ifodalash qiyin. Eng asosiysi mana shunday muhitni yoʻqotdim.

Sharjaning shayxi, klub prezidenti ketmasligimni bir necha bor soʻradi. Bu puldan muhimroq. Dubay boshqa sharoit, asosan sayyohlar uchun, ammo Sharjada yaxshi yashash uchun hamma narsa bor edi – tinch, sokinlik, har 500 metrda masjid, birgina men turgan mahallaning oʻzida 3ta masjid bor edi. Tasavvur qiling, ish bilan bankgami, biror idoragami borsam, hamma joyda menga «yashil chiroq» edi. Shunaqa muhitdan voz kechishimga toʻgʻri keldi. Buning barchasini kareram uchun qildim – futbolchi sifatida oʻsib, yangi choʻqqilarni zabt etish uchun.

«Qogʻoz berib, xohlagan raqamingni yoz deyishdi»

- Ha, moliyaviy jihatdan ham katta raqamlarni tashlab keldim. 1,8 mlndan 650 mingga tushdimi maoshim? «Sharja» kelishimdan avval oldimga qogʻoz tashladi. Mayli, shunga xohlagan raqamingni yoz, agar biz qilib bera olmaydigan boʻlsak, unda jamoadan ketishingga qarshilik qilmaymiz, deyishdi. Oldingidanam koʻp. Ammo men, «ketishga ahd qildim, ruxsat beringlar, oq yoʻl tilanglar, Insha Alloh kareram yaxshi boʻlib ketsa, bir kun qaytarman», dedim. Toʻgʻrisini aytsam, undanam kattaroq raqamlarni yoʻqotdim. Oilam ham men nima desam rozi boʻlib, meni qoʻllab-quvvatladi. Ular ham Sharjaga juda oʻrganishgandi.

«Bu klubni tramplin boʻlishi uchun ham tanladim»

- «Fotih» bilan rasman shartnoma imzoladim. Ular menga 2+1 shaklida kelishuv taklif qilishdi, men esa faqat ikki yillik shartnoma tuzdim. Bu jamoa men uchun tramplin boʻlishi uchun ham tanladim. Turkiya Superligasida oʻynagan birinchi oʻzbek futbolchisi boʻlasan deyishdi. Bu ham oʻziga xos katta mas'uliyat. Keyinchalik ham oʻzbek futbolchilariga bu erda talab boʻlishi uchun oʻzimni yaxshi tomondan koʻrsatishim kerak. Alloh yuzimizni yorugʻ qilib, nima maqsadda kelgan boʻlsak, xayrlisiga etkazishidan umidvormiz.

«Pirloning oʻzi taklif qilgani, soʻrab turgani uchun ham Sharjadagi muhitga koʻz yumdim»

- Ha, «Fotih» Turkiyaning grand klublari oldidan nisbatan kichik klub. Boshida ham bu klubdan taklif borligini aytishganida, unchalik ham e'tibor qaratmadim. Ammo bu jamoada murabbiy Pirlo ekani taklifni qabul qilishimga etarli boʻldi. Chunki futbolni tushungan borki, Pirlo qanday oʻyinchi boʻlgani, qanday oʻynaganini yaxshi biladi. Ayniqsa, Pirloning oʻzi menga qiziqish bildirib, taklif qilgani, oʻzi soʻrab turgani uchun Sharjadagi muhitga koʻzni yumib, kelishga qaror qildim. Inson hayotida nimagadir erishish uchun, nimadandir voz kechishiga toʻgʻri keladi. Ehtimol, bu men uchun burilish nuqtasi boʻlar.

«Pirloning ham, mening ham maqsadim bir – kuchliroq chempionatga oʻtish»

- Yana bir e'tiborimni tortgan jihat «Fotih Karagyumruk» oʻyinchilarni yaxshiroq darajaga koʻtarib, boshqa jamoalarga transfer qiladigan jamoa. Bu klub uch yil avval Superligaga chiqqan. Klub prezidenti, sport direktori bilan gaplashdim, bu klubning asosiy maqsadi transferlardan daromad koʻrish. Bu ham jamoani tanlashimga turtki boʻldi. Bu erda yaxshi oʻynab, yanada kuchliroq chempionatga yoʻl olish mumkin. Pirloda ham maqsad shu – bu erda oʻzini murabbiy sifatida yaxshiroq koʻrsatib, yana A Seriyaga qaytish. U ham bizdek maqsadda kelgan. Klub ham va'da berdi – yaxshi taklif tushdimi, qoʻyib yuboramiz, sotishga tayyormiz deb. Endi hammasi oʻzimizga bogʻliq, muxlislarimiz va barchaning ishonchini oqlab, yuzimiz yorugʻ boʻlishi uchun bor kuch va imkoniyatimni ishga solaman.

“Zamin” yangiliklarini “Telegram”da kuzatib boring