Srechko Katanets: "Qozogʻiston bilan oʻyin siz uchun derbi boʻlishi mumkin, lekin men uchun navbatdagi oʻrtoqlik oʻyini"

Ertangi Oʻzbekiston – Qozogʻiston oʻrtoqlik oʻyini oldidan "Paxtakor" stadioni anjumanlar zalida vakillarimiz ishtirokida matbuot anjumani oʻtkazildi. Unda Oʻzbekiston MTJ bosh murabbiyi Srechko Katanets hamda yarim himoyachi Odiljon Hamrobekov ishtirok etdi.

Dastlab Katanets va Hamrobekov oʻyinoldi fikrlari bilan oʻrtoqlashdi.

"Odatdagidek oʻrtoqlik uchrashuvi. Qandaydir oʻziga xos oʻyin deb ayta olmayman. Toʻliq tarkib bilan kam vaqt shugʻullandik", – dedi Srechko Katanets.

"Hammangizni koʻrib turganimdan xursandman. Navbatdagi oʻrtoqlik oʻyini arafasida turibmiz. Oldingi oʻyinlardagi kamchiliklarni toʻgʻrilaymiz degan umiddaman", – dedi Odil Hamrobekov.

- Murabbiyga savol. Osiyo Kubogi bir yil ortga surilishi, ya'ni 2024 yilning yanvariga qoldirilishi rejalaringizga qanchalik ta'sir qildi?
- Aniq bir rejaga ta'sir qilmadi. Biz har bir vaziyatga moslashishimiz kerak. Askincha, buning ijobiy tarafi ham bor. Koʻproq oʻrtoqlik oʻyinlari oʻtkazishimiz mumkin, tayyorgarlik uchun koʻp vaqt boʻladi. Yana bir yaxshi tomoni, chempionat noyabrda tugaydi. Yaxshi tayyorgarlik koʻrishimizga imkon tugʻaladi. Hozircha JCh-2026 saralashi qachon boʻlishini bilmaymiz.

- Ibrohimhalil Yoʻldoshevning yoʻqligi nima bilan bogʻliq?
- Men boshqa futbolchilarni sinab koʻrishni istadim. Shu bilan birga, aytishim mumkinki, u oʻz oʻyinlarini kuchaytirib borishi kerak. Albatta, uning oʻyinlarini kuzatib boryapman. Koʻpincha asosiy tarkibdan joy olyapti, zaxirada oʻtirgan payti ham boʻldi. U oʻz oʻyinini kuchaytirib borishi, oʻz ustida ishlashdan toʻxtamasligi kerak. U hali yosh, agar 30 yosh boʻlganida, boshqa chaqirilmaydi, deyishimiz mumkin edi.

- Oʻzbekiston MTJ koʻpincha soʻnggi 10-15 daqiqada gol oʻtkazib yuboradi. Bu sizgacha ham boʻlgan, oldingi oʻyinda ham uchradi. Buning ustida ishlashni iloji bormi?
- Bu barcha jamoalar bilan sodir boʻladi. Hatto dunyoning eng yaxshi terma jamoalari ham shu holga tushishi mumkin. Bu nima bilan bogʻliq ekanligini bilmayman, balki charchoqdandir. Kosta-Rika bilan oʻyinga e'tibor bersak, ular soʻnggi daqiqalarda koʻpchilik boʻlib hujumga oʻtib ketishdi. Oʻyinchilar bu vaziyatda oʻzlari aqlni ishlatib, harakat qilishlari lozim. Bu uchun ma'lum bir reja yoʻq.

- Oʻzbekiston ancha yillardan keyin Qozogʻiston bilan toʻqnash kelyapti. Ularning oʻyini biz uchun soʻroq ostida. Sizningcha, ular Osiyoda top-5 likka kirishi mumkinmi? Oʻzbekiston ertaga favoritmi?
- Osiyoni kuchli beshligiga kiritsa boʻladimi, bilmadim. Bunday terma jamoada hammasi avlodlarga bogʻliq. Yaxshi avlod etishib chiqsa, shunda oʻsha avlod bilan yaxshi oʻyin koʻrsatishi mumkin. Qozogʻiston oʻyinlarini tomosha qildim, futbolchilari astoydil kurashishadi. Ertaga oson oʻyin boʻlmaydi. Besh kishi boʻlib himoyalanishadi va tezda hujumga oʻtib ketishadi. Qozogʻiston kurashuvchan jamoa, ammo keragidan ortiq tajovuzkor harakat qiladi. Futbolchilarimiz hammasiga tayyor boʻlishlari lozim.

- Murabbiyga savol. Qozogʻistonning aynan qaysi futbolchilarini alohida ajratib koʻrsatgan boʻlardingiz?
- Menga Qozogʻistonning oʻyinlari juda yoqdi. Alohida kimnidir ajratib koʻrsatishni istamayman. Jamoaviy tarzda yaxshi oʻynashadi. Sloveniya bilan bahsni koʻrib chiqdik, tajovuzkor, sal qoʻpolroq oʻyin koʻrsatishdi. Aytib oʻtganimdek, jamoa tajovuzkor harakat qiladi. Jamoviy ruh hammasini hal etadi.

- Futbolchiga savol. Oʻzbekiston terma jamoasida hamisha yarim himoya chizigʻi kuchli boʻlib kelgan. Hozir sal kuchsizdek koʻrinyapti. Hozirgi paytda yarim himoya chizigʻidagi holatni qanday baholaysiz?
- Siz aytganingizdek, Kapadze, Jeparov, Ahmedov avlodi eng kuchli yarim himoyachilardan iborat edi. Hozirgi paytda ham eng kuchlilar jamlanishiga harakat qilyapmiz. Oʻylaymanki, biz ham akalarimiz darajasiga chiqib, oldimizga qoʻyilgan vazifalarni astoydil bajaramiz.

Futbolchiga savol. Markaziy Osiyoda termalar hamisha solishtirib kelinadi. Qozogʻiston MTJ bilan oʻyin qanchalik printsipial ahamiyatga ega?
- Hech qanday printsipial ahamiyat kasb etmaydi. Murabbiy aytganidek, navbatdagi oʻrtoqlik oʻyini. JCh va Osiyo saralashi yoʻlidagi bahs.

- Murabbiyga savol. Oʻzbekiston terma jamoasi oʻrtoqlik oʻyini Qozogʻistonga qarshi oʻtadi. Bu OAV va muxlislar uchun oddiy oʻyin emas. Bizning futbolchilarimiz va murabbiylar uchun bu shunchaliy oddiy oʻyinmi? Qozogʻistonga gʻalaba uchun hatto pul mukofoti va'da qilingan. Katta auditoriya oʻyinni jiddiy qiziqish bilan kutmoqda. Vakillarimiz raqib Qozogʻiston ekanligini his qilishyaptimi?

- Nima qila olaman? Nima deb javob berishim mumkin? Toʻgʻri, siz va koʻpchilik uchun bu derbi boʻlishi mumkin. Lekin men fikrimni oʻzgartira olmayman. Bu murabbiy sifatida men uchun navbatdagi oʻrtoqlik oʻyini. 2007 yildagi oʻyinda janjal yuzaga kelgan, lekin terma jamoalarda oʻsha tarkibdan hozir hech kim qolmagan. Albatta, futbolchilar astoydil gʻalaba uchun harakat qilishadi. Legionerlar kech etib kelishdi, bir yarim kungina toʻliq mashgʻulot olib bora oldik. Bu bizga muammo keltirib chiqaradi. Hozir koʻpchilik bu oʻyinga jiddiy ahamiyat qaratishni soʻramoqda. Lekin men ham taktik ishlanmalar ustida ishlashim mumkin. Agar menda sehrli tayoqcha boʻlganida, har bitta oʻyinda gʻalaba qozongan boʻlardik. Biroq men bu erga murabbiy sifatida rasmiy oʻyinlarni yutish uchun taklif qilinganman. Bu bahs oldidan hech qanday bosim ham qilmayapman.

- Oʻzingiz aytib oʻtganingizdek, legionerlar kech kelib qoʻshilishdi. Jumladan, Shomurodov kecha tunda keldi. Nihoyat, Igor Sergeevni asosiy tarkibda koʻramizmi yoki charchagan holda etib kelgan Shomurodov asosiy tarkibda maydonga tushadimi?
- Eldor asosiy tarkibda oʻynaydi. Shomurodov charchamagan, chunki "Roma"ning oxirgi bahsida maydonga tushmadi. U hozir boshqalarga qaraganda yaxshi holatda. “Zamin” yangiliklarini “Telegram”da kuzatib boring