"Spetsiya" Shomurodovni olib, o‘rniga jahon chempionatida o‘ynayotgan futbolchini bermoqchi

“Roma” rahbariyati qishki transferlar oldidan Eldor Shomurodov bo‘yicha turli klublardan har xil takliflar olishda davom etmoqda.

Shu paytga qadar, o‘zbek hujumchisi “Monsa”, “Kremoneze”, “Torino”, “Sampdoriya”, “Bolonya” kabi klublar nishonida turgan edi. Bu klublarning aksariyati legionerimizni yanvardagi transfer bozori uchun asosiy nishon sifatida belgilagan va Rim klubi rahbariyatiga murojaat ham qilib ulgurgan.

“Roma” mutasaddilari barcha xaridorlar oldiga bir xil talab qo‘ymoqda. Unga ko‘ra, da’vogarlar Shomurodovning transferini birdaniga to‘liq xarid qilishi yoki keyinchalik sotib olish majburiyati bilan ijaraga olish va badal summasini aniq belgilab qo‘yish lozimligini ta’kidlayapti.

Italiyaning nufuzli nashrlaridan biri https://www.calciomercato.com saytining xabar berishicha, Shomurodov uchun kurashga qo‘shilgan “Spetsiya”ning taklifi rimliklarni o‘ylantirib qo‘ydi.

Manbaning ta’kidlashicha, “Spetsiya” ham yanvarda hujum chizig‘ini kuchaytirishga qaror qilgan va asosiy nishon sifatida Eldor Shomurodovni belgilagan. Spetsiyaliklar o‘zbekistonlik forvard transferiga ikki himoyachini qo‘shmoqchi.

Ulardan biri - Yakub Kivior Qatardagi jahon chempionatida Polsha terma jamoasi safida maydonga tushib ulgurdi.

22 yoshli futbolchi markaziy himoyadan tashqari, chap qanot va tayanch yarim himoyachisi sifatida bir necha pozitsiyalarda ishonchli o‘ynay oladi.

Yakub yosh bo‘lishiga qaramay, Slovakiya va Belgiya ligalarida ham o‘ynagan. Uning transferi olti million yevro atrofida baholanmoqda.

“Spetsiya” Shomurodov o‘rniga taklif qilayotgan ikkinchi nomzod Emil Xolmdir. 22 yoshli futbolchi o‘ng qanot himoyachisi hisoblanadi va shu tarafda yarim himoyachi vazifasini ham uddalay oladi. U faoliti davomida Italiyadan tashqari, Shvetsiya va Norvegiya ligalarida to‘p tepgan.

Emil joriy mavsumda A Seriyada 14 ta uchrashuvda maydonga tushib, bitta gol va ikkita assist qayd etdi. Uning spetsiyaliklar bilan shartnomasi 2026 yilning yarmigacha imzolangan va transferi 2,5 million yevroga baholandi.

Xolm bu yildan e’tiboran Shvetsiya terma jamoasiga jalb qilina boshladi.

“Spetsiya” taklifi “Romaga ma’qul kelishi mumkinligi aytilmoqda. Chunki Tyagu Pinto bosh murabbiy Joze Mourino bilan yuz bergan mojarodan keyin jamoadan ketishga qaror qilgan Rik Karsdorp o‘rniga taklif etiladigan himoyachilar ro‘yxatiga Kirior va Xolmni ham qo‘shgan edi.

Bu vaziyatda ko‘p narsa Eldor Shomurodovning tanloviga bog‘liq bo‘ladi. Hamyurtimizga asosan A Seriyada qolish uchun kurashayotgan jamoalar da’vogarlik qilmoqda.

Demak, Eldor keyingi mavsum oldidan quyi ligaga tushib ketmaslik uchun yangi jamoa tanlashdi juda hushyor bo‘lishi va har bir jihatni inobatga olishi talab etiladi. “Zamin” yangiliklarini “Youtube”da kuzatib boring