Eldor Shomurodovga yangi da’vogar chiqdi!

Eldor Shomurodov yanvar oyi ichida “Roma”ni tark etishi tobora oydinlashib bormoqda. O‘zbek hujumchisini o‘z safida ko‘rishni istayotgan jamoalar rimliklar sport direktori Tyagu Pinto bilan muzokaralarni davom ettirmoqda.

Asosiy da’vogar – “Torino” legionerimiz transferi formulasi bo‘yicha kelisha olmayotgani haqida xabar bergan edik.

Endi Italiya matbuoti Shomurodov uchun kurashga yana bir klub qo‘shilganini yozmoqda. La Gazzetta dello Sport nashrining ta’kidlashicha, “Verona” hujum chizig‘ini o‘zbekistonlik futbolchi yordamida kuchaytirishga qaror qilgan.

Joriy mavsum “Verona” uchun o‘ta omadsiz kechmoqda. Salvatore Boketti shogirdlari 15 ta uchrashuvning atigi bittasida g‘alaba qozongan va ikki marta durang o‘ynagan. Jami besh ochko bilan musobaqa jadvalida so‘nggi pog‘onani egallab turgan veronaliklarning hujum chizig‘ida ko‘p gol ura oladigan hujumchiga ehtiyoj katta.

Hozircha, “Verona” hujumida olti nafar forvard qayd etilgan. Biroq ulardan ikki nafari hali gollar hisobini ochgani yo‘q. Uch hujumchi bittadan gol urgan. Asosiy to‘purar vazifasini bajarishi kerak bo‘lgan Toma Anri barcha bahslarda qatnashib, atigi ikki marta raqib darvozasiga yo‘l topgan xolos.

Katta ehtimol bilan Shomurodov “Verona” taklifini qabul qilmaydi. Chunki hamyurtimiz avval ham xavfli zonada borayotgan “Kremoneze” chorloviga rad javobini bergan edi. Kremoneliklar hozir ham Eldor uchun kurashmoqda.

Eldorda tanlov imkoniyati ham yo‘q emas. Yuqorida nomi keltirilgan ikki autsayder va yuqori o‘rinlarga harakat qilayotgan “Torino”dan tashqari, “Fiorentina” va “Sampdoriya” ham legionerimizga o‘z tarkibidan joy berishga tayyor.

“Roma” sport direktori Tyagu Pinto o‘zbek hujumchisi rimliklarga qimmatga tushganini inobatga olib, barcha da’vogarlarga bir xil talab qo‘ymoqda. Unga ko‘ra, 27 yoshli hujumchini qo‘lga kiritmoqchi bo‘lgan har qanday klub 10 million yevro evaziga to‘liq transferni amalga oshirishi yoki xuddi shu summani keyinchalik to‘lab berish majburiyati bilan kelasi yozgacha ijaraga olishi shart.

Eldor Shomurodov “Roma”ga o‘tganidan beri jami 48 ta uchrashuvda maydonga tushib, raqiblar darvozasini olti marotaba ishg‘ol qildi va jamoadoshlariga olti marotaba golli pas uzatdi. Garchi hujumchimizning klubdagi ishlari yurishmayotgan bo‘lsa-da, O‘zbekiston milliy terma jamoasi safida yuqori saviyada o‘ynab kelmoqda.

Yaqinda Futbol tarixi va statistikasi xalqaro federatsiyasi klub va terma jamoa miqyosida xalqaro uchrashuvlarda eng ko‘p gol urgan futbolchilar reytingini e’lon qildi. Unga ko‘ra, Shomurodov 12 ta gol bilan sakkizinchi o‘ringa loyiq topildi.

2022 yil davomida Eldor terma jamoa safida 11 ta to‘p kiritib, bu ko‘rsatkich bo‘yicha faqatgina jahon chempioni Lionel Messi (18 ta gol) va mundial vitse-chempioni Kilian Mbappedan (12 ta gol) keyin uchinchi natija qayd etgan. “Zamin” yangiliklarini “Vkontakti”da kuzatib boring