Chempion – “Paxtakor” ham “Mavsum-2023” uchun tayyorgarligini davom ettiryapti. Bosh murabbiy Maksim Shatskix oldida yanada mas’uliyatli vazifalar turibdi. Chunki u o‘z jamoasi bilan Osiyo Chempionlar ligasida qatnashadi. Bu yoqda mamlakat chempionligi hamda Kubogi uchun kurashlar bor.
Antaliyada Shatskix bilan ko‘rishdik. O‘shanda ham yig‘in haqida fikrlari bilan qiziqmoqchi bo‘lgandik. Biroq Maksim Aleksandrovich Turkiyadan qaytgach, rozi bo‘lishini aytgandi. Shundan foydalanib, bu safar yana murojaat qilganimizda o‘z fikrlarini bildirdi.
- Maksim Aleksandrovich, “Paxtakor”ning yangi mavsumga tayyorgarligidan qoniqyapsizmi? Ayting-chi, jamoangiz chempionatga necha foizga tayyor?
- Ha, rejalashtirilgan hamma ishlarni amalga oshirganimizdan ko‘nglimiz to‘ldi. Baxtimizga ob-havo ham, sparring-raqiblar ham yaxshi bo‘ldi. O‘z darajamizni boshqalarniki bilan taqqoslab olish – bu juda muhim. Tayyorgarlikni 80 foizga baholayman. Chempionat boshlanishiga 100 foizga tayyormiz, deya olmayman.
- Selektsiya jarayonida o‘zingiz istagan barcha futbolchilarni qo‘lga kirita oldingizmi yoki kimdir qolib ketdimi?
- Kimni jalb etishni rejalashtirgan bo‘lsak, barchasini oldik!
- Sardor Rashidovni taklif qilish tashabbusi sizdan chiqdimi? U o‘yin uslubingizga to‘la mos keladimi?
- Ha, Sardor Rashidovni men taklif qildim. Agar u jamoamizga mos kelmaganida, bu erda bo‘lmasdi!
- 25 fevral kuni “Paxtakor” Qozog‘istonning “Qayrat” jamoasiga qarshi o‘rtoqlik uchrashuvida o‘ynaydi. Bu o‘yin jamoangiz uchun qanchalik muhim?
- Bu xalqaro darajadagi bahs. Albatta, muhim bo‘ladi-da! Boz ustiga chempionat starti arafasida mana shunday yaxshi raqib bilan kuch sinashishga nima etsin. Bundan tashqari, o‘zaro raqobatimizning tarixi juda uzun.
- “Paxtakor” O‘zbekistonning amaldagi chempioni. Chempion bo‘lish qiyinmi yoki chempionlik kamarini himoya qilishmi?
- “Paxtakor” mamlakatning 15 karra chempioni. Omad kelsa, har qanday jamoa bir marta bo‘lsa ham chempion bo‘lishi mumkin. Ammo chempionlikni har yili isbotlash – bu juda ham mashaqqatli ish. Lekin biz bunga intilamiz.
- Barcha klublar yangi futbolchilarni transfer qildi. Siz uchun 3 ta top transfer qaysilar?
- Bizda hamma transferlar top.
- Antaliyada bir necha bor “Nasaf” ishtirokidagi o‘yinni kuzatganingizga guvoh bo‘ldik. Bu “Paxtakor”ning asosiy raqiblaridan biri. Osiyo Chempionlar ligasida mag‘lubiyatga uchradi. Buni kutganmidingiz yoki...
- Biz uchun har qanday raqib raqobatchi. “Nasaf”ga og‘ir bo‘lishini bilgandim. Ammo uning keyingi bosqichga yo‘l olishidan umid qilgandim, biroq...
Shuhratbek Jo‘raev.
“Zamin” yangiliklarini “Telegram”da kuzatib boring
