Futbol olamida eng nufuzli manbalardan hisoblangan Transfermarkt portali Rossiya Premer-ligasida o‘ynayotgan futbolchilarning yangilangan transfer narxlarini e’lon qildi.
Rossiyaning yuqori divizionida 16 jamoa jami 421 nafar futbolchilarni ro‘yxatdan o‘tkazgan. Shularning 35,9 foizi, ya’ni 151 nafari xorijlik charm to‘p ustalari tashkil qiladi. Rossiya chempionatida 49 ta mamlakatdan legionerlar o‘ynamoqda.
Eng ko‘p vakil Braziliyadan – jami 22 futbolchi. O‘zbekiston Rossiyaga besh nafar futbolchisini jo‘natgan.
Hozir Rossiyadagi eng mashhur o‘zbek o‘yinchisi Abbosbek Fayzullayev hisoblanadi. Avgust boshida “Paxtakor”dan Moskvaning SSKA klubiga ko‘chib o‘tgan 20 yoshli futbolchimiz qisqa fursatda muxlisu mutaxassislar e’tiborini qozondi. Hozir Abbosbek Fayzullayev SSKA ning yetakchi o‘yinchilaridan biriga aylangan.
Legionerimizning samarali o‘yini Transfermarkt portali ekspertlarini nazaridan ham chetda qolmadi. Hamyurtimiz Premer-liganing dastlabki o‘nta uchrashuvidan keyin transfer summasi oshgan 80 nafar futbolchidan biri bo‘ldi. Abbosbek chempionatda beshta uchrashuvda qatnashib, bittadan gol va assist qayd etgandi.
Shuningdek, Fayzullayev transfer summasi keskin ko‘tarilgan o‘yinchilar reytingida kuchli o‘nlikka kirdi. Hamyurtimizning transfer narxi, 1 million 250 ming yevroga oshib, ayni paytda 2 million yevroni tashkil qilmoqda. Bu ko‘rsatkich eng ko‘p qimmatlagan futbolchilar reytingida sakkizinchi natijadir.
Rossiya Premer-ligasida transfer summasi oshgan o‘yinchilar qatorida “Rubin”da o‘ynayotgan hujumkor futbolchimiz Umarali Rahmonaliyev ham bor. 20 yoshli legionerimizning narxi uch oy ichida 400 ming yevrodan 600 ming yevroga ko‘tarildi.
Umarali Rahmonaliyev “Rubin” safiga shu yilning boshida erkin agent sifatida qo‘shilgandi. Bungacha iste’dodli futbolchi O‘zbekiston Superligasida “Bunyodkor” sharafini himoya qilib kelgan.
Legionerimiz Premer-ligada sakkizta va Rossiya kubogida to‘rtta uchrashuvda maydonga tushdi. Umarali hali gollari va assistlari hisobini ochmagan bo‘lsa-da, ko‘rsatayotgan o‘yini muxlisu mutaxassislar tomonidan yuqori baholanmoqda.
Rossiya Premer-ligasidagi yana uch nafar vakilimizning transfer summalari yozda yangilanganicha hali o‘zgarish bo‘lgani yo‘q.
“Rubin” himoyachisi Rustam Ashurmatovning transfer summasi 700 ming yevro ekani ko‘rsatilgan. Rustam Premer-ligada to‘rt marta maydonga tushdi. Rossiya kubogida ham to‘rtta o‘yin o‘tkazgan futbolchimiz o‘z hisobiga bitta gol ham yozdirib qo‘ygan.
“Nijniy Novgorod” jamoasidagi hamyurtlarimizda ham jiddiy o‘zgarishlar yo‘q. Joriy mavsumda ikki turnirda beshta o‘yin o‘tkazgan Ibrohimxalil Yo‘ldoshev 900 ming yevroga baholanmoqda.
Uning jamoadoshi Ruslan Jiyanov esa, jamoaga yaqinda qo‘shilgan va hozircha, Rossiya kubogida bir necha daqiqa o‘ynadi, xolos. Ruslanning transfer summasi bugungi kunda 450 ming yevroni tashkil qilmoqda.
“Zamin” yangiliklarini “Instagram”da kuzatib boring
