Rossiya matbuoti Abbosbek Fayzullaevni Premer-liganing yangi yulduzi, deb atadi. Bu bejiz emas, albatta. 20 yoshli futbolchimiz shijoati sababli “armiyachilar” jamoasida asosiy figuraga aylandi.
Iste’dodli futbolchimiz joriy yilning avgust oyida “Paxtakor”dan TsSKAga ko‘chib o‘tgan pallada yangi jamoasidagilar uni yaxshi qabul qilishdi. Legionerimizning Rossiyada o‘ynab keta olishiga shubha bilan qaraganlar tezda fikrini o‘zgartirishiga to‘g‘ri keldi.
Eng asosiysi, Abbosbek Fayzullaev uncha-muncha futbolchilarni tan olmaydigan moskvalik fanatlarning ham mehrini qozona oldi. Buni muxlislarning ijtimoiy tarmoqlar orqali Abbosbek Fayzullaev haqidagi fikrlaridan ham bilib olish mumkin.
Sports.uz portali o‘zbekistonlik futbol ishqibozlari e’tiboriga TsSKA muxlislarining Fayzullaev haqidagi mulohazalarini havola etadi.
Ded za TsSKA:
Muxlislar va mutaxassislar ishtirokida o‘tkazilayotgan so‘rovnomalarda Abbos doim birinchi o‘rinni egallayapti. Alohida uchrashuvlarda ham Fayzullaev eng zo‘ri. Muxlislar uni yoqtirib qoldi, raqiblar tinimsiz oyog‘iga tepyapti. Abbosga salomatlik va muvaffaqiyatli o‘yinlar tilaymiz.
VeniaminS:
So‘rovnomalarda eng zo‘ri, deb topilayotgani adolatdan. O‘zini yaxshi tomondan ko‘rsatmoqda.
Interes:
Shubhasiz zo‘r transfer. Arzimagan xarajat bilan o‘zini ishga yuz foiz bag‘ishlay oladigan futbolchi olib kelindi.
Drug01:
Bu futbolchi TsSKAga katta syurpriz bo‘ldi.
ANATOLY KANDAUROV:
Fayzullaev Rossiya Premer-ligasining oktyabr oyidagi eng yaxshi o‘yinchisi. Bu yigit zo‘r o‘ynayapti, muhimi, juda barqaror. Balli!
Darvina:
Abbos, shunday o‘ynashda davom et! Bu o‘yinchi jamoaga juda zo‘r kirishib ketdi, ko‘p foyda keltiryapti, texnikasi shunchaki ajoyib.
070slava:
Abbos hozir Premer-ligada eng zo‘ri!
Qwert00:
Abbos tarkibda juda kuchaytirdi. Endi bo‘sh kelmasligi kerak.
Carvalho7:
Abbos jamoaning musobaqa jadvalida ko‘tarilishiga hissa qo‘shmoqda. U bo‘lmaganida Chalov, Zabolotniy, Oblyakov kabi hujumchilar raqib jarima maydonchasi ichida to‘pni kutib o‘tiraverardi va biz jadvalning o‘rtasida bo‘lardik. Fayzullaev keskinlik oshira oladigan TsSKAdagi yagona o‘yinchi.
CSKA1980909:
Hammasi reja bo‘yicha ketyapti. Eng muhimi, Fayzullaevni qimmat narxga transfer qilish kerak.
Pimenov1967:
Abbos, bo‘shashtirma, xuddi shunday davom et!
Filman:
Abbos zo‘r bola ekan. Juda kamtarin.
Kr12cer:
Boshida Davilani asosiy tarkibga, Fayzullaevni kelajak uchun oldik, deyishgandi. Uch oy ichida Abbos asosiy figuraga aylandi, Davila 15 daqiqa o‘ynayapti.
Mikredarmy:
Fayzullaev noyabrda ham eng zo‘r o‘yinchi bo‘ladi.
“Zamin” yangiliklarini “Odnoklassniki”da kuzatib boring
