Sloveniya "Yevro-2024" saralashida "H" guruhidan o‘rin olib, ikkinchi o‘rin bilan turnir ishtirokchisiga aylandi. Jamoa so‘nggi turda Qozog‘istonni mag‘lub qilib, yo‘llanmani qo‘lga kiritdi. Bu orqali Sloveniya o‘z tarixida ikkinchi bor Yevro saralashidan muvaffaqiyatli o‘tdi. Birinchisi 2000 yilda Srechko Katanes qo‘l ostida bo‘lgandi.
1998 yil Sloveniya Srechko Katanetsni terma jamoaning bosh murabbiyi etib tayinladi. Belgiya va Niderlandiya mezbonlik qilgan Yevro chempionatiga saralash bahslarida 2-guruhdan joy olib, 2-o‘rinni qo‘lga kiritdi. Chempionatda esa 16 ta davlat ishtirok eta olardi. Niderlandiya va Belgiya to‘g‘ridan to‘g‘ri chiqadi, qolganlar 9 ta guruhga bo‘linib, kuch sinashadi. Birinchi o‘rinni egallagan ham Yevro ishtirokchisiga aylanadi. Shu bilan birga, eng yaxshi 2-o‘rinni olgan ham. Qolgan 8 ta jamoa o‘rtasida pley-off uchrashuvlari bo‘lib o‘tadi. Sloveniya bu bosqichda Ukrainani umumiy 3:2 hisobida mag‘lub qilib, "Yevro-2000" sari yo‘l olgan.
Ammo turnirdagi ishtirok omadsiz kechadi. Dastlabki turda Yugoslaviya bilan bo‘lib o‘tgan o‘yinda 3:0 hisobida oldinda borayotgan Katanes shogirdlari yakunda 3 ta gol o‘tkazib, ochko yo‘qotadi. Keyingi uchrashuvda Ispaniyaga taslim bo‘lgan sloveniyaliklar 3-turda Norvegiya bilan durangga imzo chekadi. Shu bilan birga, 2 ochko to‘plagan holda to‘rtinchi o‘rin bilan chempionatni tark etadi.
"Yevro-2000"ni esa Fransiya qo‘lga kiritadi. Ikki yil oldin mundialda zafar quchgan Zidan va uning do‘stlari finalda Italiya ustidan g‘alaba qozonadi. Asosiy vaqt 1:1 hisobi bilan tugaganidan keyin qo‘shimcha taymlarga murojaat qilingan va o‘sha paytda oltin gol, ya’ni kim birinchi gol ursa, o‘sha g‘olib hisoblanardi. 103-daqiqada Trezege Toldo darvozasini ishg‘ol qildi.
"Yevro-2000"dan keyin Katanes terma jamoadagi faoliyatini davom ettirdi. Axir u tarixiy ishni amalga oshirdi. Keyingi katta musobaqa esa Jahon chempionati. Sloveniya bu safar ham pley-off orqali turnirga yo‘l oldi, lekin 2002 yilda bo‘lib o‘tgan mundialda jamoa bir ochko ham ololmadi. Ispaniya, Janubiy Koreya va Paragvayga mag‘lub bo‘ldi. Jahon chempionatidan keyin Srechko Katanes o‘z lavozimidan ozod qilindi.
“Zamin” yangiliklarini “Twitter”da kuzatib boring
