O‘zbekiston terma jamoasi uchun Osiyo Kubogida mas’uliyatli palla yaqinlashmoqda.
Ilk turda Suriya bilan durang o‘ynagan vakillarimiz ikkinchi turda Hindistondan ustun kelishdi. Lekin bu bilan hali guruhdan chiqish masalasi hal qilingani yo‘q. Garchi Avstraliya bilan o‘yinda bizni durang natija qoniqtirsada avvalgi alamli mag‘lubiyatlar uchun revansh olish hissi yuqori. Mazkur uchrashuv oldidan O‘zbekiston terma jamoasi bilan 3ta Osiyo Kubogi havosini ko‘rgan, tajribali sobiq himoyachi Anzur Ismoilovning fikrlarini tingladik.
- O‘zbekiston terma jamoasi guruhdan 2 xil raqibga qarshi turli natija va o‘yin ko‘rsatdi. Bu uchrashuvlarni bir-biri bilan taqqoslaydigan bo‘lsak, sobiq futbolchi sifatida qanday taassurotlar oldingiz?
- Aytishim mumkinki, bizning yigitlar yaxshi o‘yin ko‘rsatishmoqda. Hindiston bilan o‘yinda murabbiylar shtabi futbolchilarning imkoniyatidan kelib chiqib o‘zgarishlar qilishdi va bu sezildi. Abbos Fayzullayev yana ochildi. Qolganlar ham o‘zini ko‘rsatishga harakat qilmoqda. Terma jamoamiz guruhdan chiqadi va sovrinli o‘rinlardan birini egallaydi, degan umiddaman.
- Suriya bilan o‘yinndan so‘ng xavotirlar bor edi. Hindiston fonida esa kuchli ko‘ringanimiz aniq. Avstraliya bilan qanday o‘yin kutyapsiz?
- Suriya azaldan prinsipial raqib bo‘lib kelgan. Kuperni bilaman, asosiy maqsadi gol o‘tkazmaslik. Keling, terma jamoamizni o‘sha o‘yinini kechiraylik, chunki baribir hayajon, sarosima degan narsa bo‘ladi. Hindiston bilan o‘yindan so‘ng futbolchilar o‘zlariga ishonchni his qilishdi, deb o‘ylayman. O‘yindan-o‘yinga yanada ochilib borishadi.
- Avstraliya kuchli raqib. Lekin ularning Jahon chempionatida o‘ynagan tarkibidan aksariyat futbolchilar, yulduzlar yo‘q. Jamoa sifatida o‘z kuchimizni ko‘rsata olamizmi?
- Avstraliya jismonan baquvvat, yuguradigan va kurashga kirishadigan futbolchilarga ega. Lekin bizda ham har bir chizig‘imizda kuchli futbolchilar jamlangan. Fikrimcha, katta farq kuzatilmaydi. Ammo tarkibimizda yo‘qotishlar borligini unutmaslik kerak. Husniddin Aliqulov, Xojiakbar Alijonov jarohat sabab yordam bera olmaydi. Bu o‘yinda yigitlarga ishonaman. Men doim ishonch bilan gapiraman. Avstraliyaga yutqazmaymiz.
- Garchi durang keyingi bosqichga chiqishimiz uchun yetarli bo‘lsada Avstraliya bilan hisob-kitobimiz bor. Mana shu faktorni ruhiy tomonlama qanchalik ta’siri bor?
- Avstraliyani oldin yutmaganmiz. Bu avval bizning avlod o‘ynagan kuchli Avstraliya emas. O‘sha paytda Viduka, Kyuell, Kexill, Breshiano kabi yulduzlari bo‘lar edi. Hozir tarkibi o‘zgargan. Umuman olganda o‘ynasa bo‘ladigan raqib.
- Iroq Yaponiyani yutdi, Iordaniya Koreya bilan durang o‘ynadi. Bu biz uchun yaxshigina qo‘ng‘iroq emasmi?
- Hozir barcha futbol o‘ynashni biladi. Yaponiyaning mag‘lubiyati ochig‘i hayron qoldirdi. Iroq kurashuvchan jamoa. Iordaniyachi? Oldindan kuchli terma jamoa bo‘lgan. Ular ham shunchaki maydonga chiqmaydi.
- Guruhdan chiqqan taqdirimizda qaysi bosqichga yetib borishimizni taxmin qilasiz?
- Kuchli uchlikda bo‘lamiz. Bu futbolchilarga qarab, bemalol sovrinli o‘rinlarni egallaymiz, deya olaman. Tarkibimizda legionerlar ham hech kimdan qolishmaydi. Terma jamoamizga omad tilayman.
Muallif: Iskandarov Abdulaziz
“Zamin” yangiliklarini “Twitter”da kuzatib boring
