Abbosbek Fayzullayevni grand klub olib ketadi...

Faoliyatida oʻzgarish boʻlishi kutilayotgan iste'dodli oʻyinchilarimizdan biri 21 yoshli Abbosbek Fayzullayev hisoblanadi.

Hujumkor futbolchimiz 2023 yilning avgustida “Paxtakor”dan SSKAga koʻchib oʻtib, Rossiya maydonlarida porlay boshlaganidan keyin uning Evropa top-klublariga oʻtishi tinmay muhokama qilinmoqda.

Rossiyalik mutaxassislar orasida Abbosbek Fayzullayevning oʻyinini yuqori baholab, kuchli ligalarda oʻynab ketishiga ishonayotgan mutaxassislar koʻp.

Biroq qiziq tomoni shundaki, legionerimizning jismonan ixcham oʻyinchi ekanini birinchi oʻringa qoʻyib, uning imkoniyatlariga shubha bilan qarayotganlar ham topilmoqda.

Roman Shishkin, “Spartak” Moskva jamoasi sobiq futbolchisi:
- Bu mavsum kashfiyoti kim? Menga SSKAdagi Abbosbek Fayzullayev juda yoqadi. Lekin uni aynan bu mavsumning kashfiyoti, deb boʻlmaydi. Fayzullayevni tez orada grand klublarning biri olib ketadi.

Abbosbek Fayzullayev boshqa futbolchilar orasida oʻz oʻyinlari bilan yaqqol ajralib turibdi. Bu mavsum kashfiyoti esa, Batrakov boʻldi. Umuman olganda, har bir jamoada yaxshi oʻynayotgan oʻz etakchi oʻyinchilari bor.

Vladimir Ponomaryov, SSKA sobiq futbolchisi:
- Meni SSKA hujum chizigʻini kuchaytiradigan oʻyinchi olmayotgani xavotirga solyapti. Markazga pas uzata oladigan qanot hujumchilari kerak. Darvoza oldiga oʻrtadan kirib boʻlmaydi, shu bois qanot hujumchilari kerak. Qolgan pozitsiyalar joyida.

Tamerlan Musayev oldingi chiziqda sal koʻzga tashlandi. Ivan Oblyakov yaxshi oʻynaydi, lekin unga har doim nimadir etishmaydi. Fayzullayev hujumda yaxshi harakat qiladi deyilyapti. Ha, shunday, lekin u juda engil oʻynaydi.

Hozir hamma Abbosdan hayratlanyapti. U hech qanday koʻrsatmalar boʻlmagan koʻcha futbolini namoyish qilyapti. Toʻgʻri kelgan tomonga qarab yugurib ketaveradi. Biroq driblingi juda yaxshi. Toʻp bilan yugura oladi. Jismoniy imkoniyati tugasa, Fayzullayev ham tamom boʻladi.

Ta'kidlash joizki, Abbosbek Fayzullayev uchun 2024 yil muvaffaqiyatli boʻldi. Legionerimiz Osiyoning eng yaxshi yosh futbolchisi, Oʻzbekistonda yil futbolchisi sovrinlari bilan taqdirlandi. SSKA rahbariyati uning mehnatlarini inobatga olib, shartnomani yangilamagan holda, maoshini sezilarli darajada koʻtardi.

Fayzullayev joriy mavsumda 23 ta uchrashuvda uchta gol va oltita assist muallifi boʻldi. Transfermarkt portali hamyurtimizning transfer summasini 8 million evroga koʻtardi. “Zamin” yangiliklarini “Youtube”da kuzatib boring