Nihoyat, Abduqodir Husanovning “Manchester Siti”ga transferi rasman e'lon qilindi. E'tirof etish kerakki, 20 yoshli oʻzbek futbolchisi Angliyaning amaldagi chempioni safiga borib qoʻshilishi kutilmagan voqea boʻldi.
Oʻzbek futbolchisini 100 ming yevroga olgan “Lans”ning bir yarim yildan keyin oʻz kashfiyotini 500 baravar qimmatiga “Manchester Siti”ga oʻtkazgani haqiqatan shov-shuvli transfer boʻldi.
Endi oʻzbek futboli ishqibozlari iqtidorli legionerimizning Xosep Gvardiola qoʻl ostida asosiy tarkibda oʻynab ketishidan umidvor. Zero, jahonning eng murakkab va ayni paytda eng obroʻli ligasida toʻp tepish oson emasligini barcha yaxshi biladi.
Abduqodir Husanovning futboldagi faoliyatiga doir qiziqarli va aniq faktlarni havola etamiz.
Abduqodir Husanovga bir paytning oʻzidan “top-5” ligalarining barchasidan 20 yaqin klubdan qiziqish boʻldi. Ular orasida "Real Madrid" ham bor edi.
* * *
Abduqodir bobosining familiyasini olgan. Otasi – sobiq futbolchi Hikmat Hoshimov uni ortiqcha bosimdan himoyalash uchun familiyasini oʻzgartirgan.
* * *
Belarusga 16 yoshida kelgan va voyaga etgunga qadar ikki yil davomida shunchaki mashgʻulotlarda qatnashib yurgan.
* * *
Husanov aslida tayanch yarim himoyachisi va professional faoliyatidagi ilk klubi “Energetik-BGU”da himoya markaziga oʻtkazilgan.
* * *
“Energetik-BGU”da jismoniy tayyorgarligi yuqori boʻlgani uchun Fransiya chempionatiga tez moslashganini alohida e'tirof etgan.
* * *
Husanov 20 yoshgacha futbolchilar oʻrtasida Osiyo chempioni.
* * *
Xalqaro futbol hamjamiyati e'tiboriga 20 yoshgacha boʻlgan futbolchilar oʻrtasidagi jahon chempionatida tushgan.
* * *
Jahon chempionatida oʻzini koʻrsatgan Abduqodir Husanovni birinchi boʻlib “Manchester Yunayted” skautlari payqagan, lekin klub menejmenti bu transferga toʻsqinlik qilgan.
* * *
“Lans” bosh murabbiyi Uill Still Abduqodirni Olimpiya oʻyinlarida boshqa sport turlarida ham musobaqalashishi mumkinligiga ishonadi.
* * *
Husanov bugungi kunda eng tezkor oʻzbek futbolchisi. Tezligi soatiga 37 kilometr.
* * *
Abduqodir 2023 yili “Lans”ning mavsumoldi yigʻinida “Manchester Siti”ning ashaddiy raqibi “Manchester Yunayted” arenasi “Old Trafford”da toʻp tepgan.
* * *
Ilk bor Oʻzbekiston terma jamoasi bilan Parij Olimpiadasida ishtirok etdi.
* * *
Husanov Fransiya chempionatida birinchi oʻzbek futbolchisi.
* * *
Abduqodir Angliya Premer-ligasidagi ilk oʻzbek himoyachisi.
* * *
Legionerimiz Evropaning “top-5” ligalaridan ikkitasida oʻynagan yagona oʻzbek futbolchisi.
* * *
Transfermarkt portaliga koʻra, 12 million yevro bilan Oʻzbekiston va Markaziy Osiyoning eng qimmat futbolchisi.
* * *
“Manchester Siti” jami 50 million yevro toʻlagani bois “Lans” tarixidagi eng qimmat transfer egasi.
Aslida Abduqodir Husanov haqidagi fakt va qiziqarli ma'lumotlarni yana uzoq davom ettirish mumkin. Davomini legionerimiz Angliya Premer-ligasidagi debyutidan keyin sanaymiz...
Manba: Sports.uz “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
