Abduqodir Husanov Angliya Premer-ligasi klubi bilan uzoq muddatli rasmiy shartnoma tuzgan birinchi va yagona oʻzbek futbolchisi sifatida oʻz nomini tarixga yozdirib qoʻydi.
Oʻz yurtida professional darajada birorta uchrashuvda maydonga tushmagan oʻzbekistonlik futbolchining qisqa muddatda dunyoning eng qudratli klublaridan biriga oʻtishini haqiqiy sarguzashtga qiyoslay mumkin.
Tasavvur qiling, 2022 yili Belarus chempionatida ilk professional bitimini imzolagan Husanov bir yildan keyin Fransiyaning oʻsha paytdagi vitse-chempioni “Lans”ga koʻchib oʻtgandi. Evropaning “Top-5” ligasidagi faoliyatini boshlaganidan bir yarim yil oʻtib, legionerimiz Angliyaning amaldagi chempioni safiga qoʻshildi.
Abduqodir Husanovni Evropaning yigirmaga yaqin klubi changalidan yulib olgan “Manchester Siti” klubi bosh murabbiyi Xosep Gvardiolani oʻzbek oʻyinchisining qaysi xususiyatlari qiziqtirib qoʻygan edi?
Evropa futboli ekspertlari 20 yoshli himoyachining “Lans” klubi va Oʻzbekistonning yoshlar va milliy terma jamoalaridagi oʻyinlarini tahlil qilib, “Manchester Siti” ustozining e'tiborini qozongan futbolchimizning boshqalarga nisbatan uchta kuchli jihatini aniqlashdi.
Dinamika va shiddat: Abduqodir Husanov toʻpni olib qolish va toʻxtatib qolish kabi muhim himoyaviy koʻrsatkichlarni yuqori darajada uddalashi bilan ajralib turadi. Bu koʻrsatkichlar boʻyicha u Fransiya chempionatining eng zoʻr himoyachilari reytingida peshqadamlardan biri boʻlgan.
Koʻpfunktsiyaviylik: Bu terminni serqirralik, universallik kabi boshqa atamalar bilan ham turlicha nomlash mumkin. Husanovning asosiy ampluasi markaziy himoyachi boʻlishiga qaramay, turli himoyaviy sxemalarga moslasha oladi, orqa chiziqning istalgan nuqtasida, hatto har ikki qanotda ham oʻynay oladi. Bundan tashqari, 20 yoshli futbolchi zarur vaziyatda tayanch yarim himoyachisi vazifasini ham uddalaydi. Universallik bosh murabbiy Xosep Gvardiola alohida qadrlaydigan xususiyatlardan hisoblanadi.
Oʻsish salohiyati: Abduqodirning ayni paytda hammani hayratga solayotgan mavqei bu eng yuqori daraja emas. Himoyachi sifatida himoyalanishning koʻplab koʻnikmalarini oʻzlashtirgan futbolchimiz mahoratini yanada oshirish salohiyatiga ega. “Manchester Siti” murabbiylari oʻzbekistonlik legionerning yangi qirralarini ochishi kutilyapti.
Bundan tashqari, Husanov yosh boʻlishiga qaramay, xotirjam va sovuqqonlik bilan harakat qilishi, yakkakurashlardan qochmasligi, tezligi juda yuqori ekani, hujum va qarshi hujumlarni boshlash mahorati, oʻyinni oʻqish qobiliyati juda yaxshi shakllangani ham e'tirof etilmoqda.
Ekspertlar “Manchester Siti”ning oʻyin uslubi “Lans”nikidan farq qilishi, “shaharliklar” toʻpni toʻliq nazorat qilish orqali oʻyin tashkil etishini inobatga olib, aynan mana shu jihat Abduqodir Husanovdan talab qilinishini ham ta'kidlab oʻtdi.
Eng muhimi esa, Husanov Xosep Gvardioladek jahon futbolida ham oʻyinchi, ham murabbiy sifatida chuqur iz qoldirgan insondan saboq olish imkoniga ega boʻldi. Qolaversa, endi zamonaviy futbol vatani Angliyada ham Abduqodir Husanov timsolida oʻzbek futbolchilarining nimalarga qodirligini bilib olishadi. “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
