«Real Madrid» to‘rt yulduzi bilan xayrlashishi mumkin — kimlar jamoani tark etadi?

Madridning «Real» klubida yozgi transferlar davri yaqinlashar ekan, ayrim muhim futbolchilarning jamoadagi taqdiri so‘roq ostida qoldi. Jumladan, tajribali yarim himoyachi Luka Modrich, himoyachilar David Alaba, Lukas Vaskes hamda Fran Garsiyaning jamoani tark etishi mumkinligi aytilmoqda.

Ma’lum bo‘lishicha, Luka Modrich va Lukas Vaskesning madridliklar bilan amaldagi shartnomalari mavsum yakuni bilan o‘z nihoyasiga yetadi. «Qirollik klubi» rahbariyati esa hozircha bu ikki futbolchi bilan yangi kelishuv tuzish borasida yakuniy qarorga kelmagan va buning ustida muhokamalar davom etmoqda.

Shu bilan birga, jamoaning tayanch himoyachisi David Alaba va yosh himoyachi Fran Garsiya ham yozgi transfer oynasida sotilishi mumkinligi haqida xabarlar tarqalgan. Murabbiylar shtabi va klub rahbariyati bu boradagi yakuniy qarorni mavsum so‘nggida qabul qiladigan bo‘ldi.

Ayni vaqtda, La Liga doirasida 33 turdan so‘ng «Real» turnir jadvalida ikkinchi o‘rinda bormoqda. Karlo Anchelotti boshchiligidagi jamoa 72 ochko jamg‘argan holda peshqadam «Barselona»dan 4 ochko ortda qolmoqda.

Madridliklar mavsumni kuchaytirilgan tarkib bilan davom ettirish uchun yozda jiddiy o‘zgarishlarga qo‘l urishlari kutilmoqda. “Zamin”ni Telegramʻda oʻqing!