"Bavariya" ikki transferidan pushaymon: Saragosa va Boedan tezroq qutulmoqchi

Germaniyaning eng kuchli jamoalaridan biri bo‘lgan "Bavariya" transfer bozorida har doim o‘ziga xos strategiyasi va o‘ta ehtiyotkorligi bilan ajralib turadi. Ammo ba’zida Myunxen grandi ham yangi o‘yinchilarni olishda kutilmagan xatolarga yo‘l qo‘yib turadi.

Jumladan, klub rahbariyati o‘tgan 2024 yil davomida amalga oshirgan ikki transferidan qattiq pushaymon bo‘lgan. Bular Ispaniyadan keltirilgan qanot hujumchisi Brayan Saragosa va Fransiyadan olib kelingan himoyachi Sasha Boelardir. Bild nashri tarqatgan xabarga ko‘ra, "Bavariya" endi bu ikki futbolchidan yozgi transferlar oynasida qutilishni rejalashtirmoqda.

Ispaniyalik Saragosa o‘z yurtining "Granada" klubi tarbiyalanuvchisi bo‘lib, myunxenliklar avval uni yarim mavsumga ijaraga olib, keyinroq to‘liq transfer qilishga qaror qilgan edi. Ammo bu mavsumni ijara asosida "Osasuna"da o‘tkazayotgan Saragosa ispan jamoasi safida 23 o‘yinda maydonga tushib, faqatgina bitta gol urgani bilan umuman klub umidlarini oqlay olmadi.

Shuningdek, fransiyalik Sasha Boeni jamoaga jalb qilish uchun "Bavariya" 2024 yil yanvarda Turkiyaning "Galatasaroy" klubiga 30 million yevro to‘lagan edi. Ammo 23 yoshli himoyachi barcha musobaqalarda atigi 17 marta maydonga tushib, o‘zining yuqori iqtidorini namoyish eta olmadi va klubdagi kelajagini xavf ostiga qo‘ydi.

Natijada, "Bavariya" rahbariyati bu ikki transferdan qat’iy voz kechishni va ularning o‘rniga yangi nomzodlar qidirishni boshlab yuborgan. Klub tez orada Saragosa va Boeni boshqa jamoalarga sotib, yoki ijaraga berib, jamoa budjetiga tushgan zararni qisman bo‘lsa-da qoplab olishga harakat qilmoqda.

Hozircha ushbu futbolchilarga qaysi klublar qiziqish bildirishi noma’lum. Ammo "Bavariya" tez orada bu transferlarni amalga oshirishga va o‘rniga munosib nomzodlarni topishga kirishadi. “Zamin”ni Telegramʻda oʻqing!