«Barselona» yangi formada: rep yulduzi Trevis Skottning brendi «El-klasiko»da taqdim etiladi!

Ispaniya La Ligasining 35-turidan o‘rin olgan, futbol muxlislari orziqib kutayotgan markaziy bahs – «El-klasiko»da «Barselona» klubi futbolchilari o‘z muxlislari uchun maxsus syurpriz tayyorladi.

Bu safar kataloniyaliklar Madridning «Real» jamoasiga qarshi bahsda mashhur Amerika rep yulduzi Trevis Skottning shaxsiy brendi – «Cactus Jack» logotipi aks etgan eksklyuziv futbolkada maydonga tushishadi. Bu haqda klubning rasmiy matbuot xizmati ma’lum qildi.

Ushbu original hamkorlik faqat erkaklar jamoasi bilan cheklanib qolmaydi. «Barselona»ning ayollar jamoasi ham Liga Femenina chempionati 30-tur doirasida xuddi shu maxsus formada o‘yin o‘tkazadi.

E’tiborlisi, Kataloniya klubi so‘nggi yillarda «Spotify» bilan hamkorlikda muntazam ravishda shunga o‘xshash kreativ aksiyalarni amalga oshirib keladi. Bunga qadar, «Barselona» futbolchilari «Coldplay», «Karol G», «The Rolling Stones», «Rosalía» va «Drake» kabi dunyoga mashhur musiqachilarning brendi tushirilgan futbolkalarda maydonga tushib, muxlislarga katta taassurot qoldirishgan edi.

Shuningdek, klub bu kabi noyob hamkorlik orqali jamoaning xalqaro maydondagi nufuzini oshirish va yosh auditoriyaning diqqatini jalb qilishni maqsad qilgan. Bu yilgi forma esa, shubhasiz, futbol muxlislari va rep san’ati ixlosmandlari o‘rtasidagi qiziqishni yanada oshiradi.

Ushbu maxsus formalar faqat cheklangan miqdorda ishlab chiqariladi va jamoaning rasmiy do‘konlarida sotuvga chiqariladi.

Kataloniyaliklarning yangi libosda qanday natija ko‘rsatishi katta qiziqish uyg‘otmoqda. «Barselona» va «Real» o‘rtasidagi mazkur muhim o‘yin ko‘p millionli muxlislar auditoriyasini televizor ekranlari oldiga to‘playdi. Uchrashuv dunyo futbolidagi eng muhim bahslardan biri sifatida tarixda qolishi shubhasiz.

Futbol va musiqa olamining noyob uyg‘unligidan bahramand bo‘lishni istagan muxlislar uchun ushbu o‘yin haqiqiy bayramga aylanishi mumkin. “Zamin”ni Telegramʻda oʻqing!