Gullit “Barselona”ni himoya qildi: “Inter”ga qarshi o‘yinda hakam adolatsizlik qildi

Yevropa Chempionlar ligasi yarim finalining dramatik va tortishuvlarga boy javob bahsidan so‘ng, jahon futboli afsonalaridan biri — Rud Gullit “Barselona” jamoasiga nisbatan adolatsizlik bo‘lganini ta’kidladi. Uning fikricha, “Inter”ning hal qiluvchi ikki goli shubhali holatlar ichida kiritilgan va hakam Shimon Marchinyak bu epizodlarda noto‘g‘ri qaror qabul qilgan.

Gullit, ayniqsa, Kubarsi va Lautaro Martines o‘rtasidagi penalti tayinlangan vaziyatga jiddiy e’tiroz bildirdi:

“Bu epizodda penalti bo‘lishi mumkin emasdi. Bu oddiy o‘yin harakati, hech qanday qoidabuzarlik ko‘rinmagan. Hakam bu holatda ehtimol, bosim ostida noto‘g‘ri qaror qabul qildi.”

Shuningdek, u “Inter”ning uchinchi goli oldidan Dumfris tomonidan sodir etilgan holatga ham to‘xtaldi:

“Bu gol umuman hisobga olinmasligi kerak edi. Dumfris Barselona himoyachisi Jerar Martinni to‘sib qo‘ydi va to‘pga yetishish imkonini chekladi. Bu aniq qoidabuzarlik. Uning gavdasini qanday qo‘yganini ko‘rsangiz, buning oldindan rejalashtirilgani seziladi.”

Gullit shuningdek “Barselona”ning o‘yinini maqtar ekan, ularning nafaqat salohiyati, balki muxlislarga bag‘ishlagan tuyg‘ulari haqida ham so‘z ochdi:

“Barsa” bu ikki uchrashuvda ham yurak bilan o‘ynadi. Ular g‘alaba qozonishga loyiq edi. Haqiqiy jamoa, haqiqiy futbol, haqiqiy xarakter — shuning uchun ular muxlislar qalbini zabt etdi. Lekin afsuski, natija bunga mos bo‘lmadi.”

Eslatib o‘tamiz, “Inter” va “Barselona” o‘rtasidagi javob uchrashuvi 4:3 hisobida yakunlandi va milanliklar umumiy 7:6 natija bilan finalga yo‘l oldi. Shimon Marchinyakning hakamlik faoliyati o‘yindan so‘ng nafaqat “Barsa” murabbiyi Xans-Diter Flik, balki jamoa a’zolari tomonidan ham tanqidga uchradi.

Rud Gullitning bu so‘zlari esa futbolda adolat va hakamlik sifati atrofidagi muhokamalarni yanada qizitishi aniq. Shunday ekan, bu bahs bir muddat futbol maydonida to‘xtagan bo‘lsa-da, jamoatchilik muhokamasida hali uzoq davom etadi. “Zamin”ni Telegramʻda oʻqing!